އަފްޣާނިސްތާނުގެ އުތުރުގެ މަޒާރް ޝާރިފް ސަރަހައްދަށް 6.3 މެގްނިޓިއުޑްގެ ބާރުމިނުގައި އައި ބާރުގަދަ ބިންހެލުމުގައި ހަތް މީހުން މަރުވެ 150 އަށް ވުރެ ގިނަ މީހުން ޒަހަމްވެފައިވާ ކަމަށް އެ ގައުމުގެ އޮފިޝަލުން ބުނެފިއެވެ.

އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް) އިން ބުނީ ބިންހެލުން އައިސްފައިވަނީ އެ ގައުމުގެ ގަޑިން ރޭ މެންދަމު 12:59 ގައި މަޒާރު-އި-ޝާރިފް ކައިރިން ކަމަށެވެ.

މަޒާރް ޝަރީފް ކައިރީގައި އޮންނަ ސަމަންގަން ޕްރޮވިންސްގެ ޕަބްލިކް ހެލްތު މިނިސްޓްރީގެ ތަރުޖަމާން ސާމިމް ޖޮޔަންޑާ ރޮއިޓާސް އަށް ވިދާޅުވީ މި ބިންހެލުމާއި ގުޅިގެން މިއަދު ހެނދުނާއި ހަމައަށް 150 އަށް ވުރެ ގިނަ މީހުން ޒަހަމްވެ، ހަތް މީހަކު މަރުވެފައިވާ ކަމަށެވެ.

އޭނާ ވިދާޅުވީ މި އަދަދުތައް ލިބިފައިވަނީ މިއަދުގެ ހެނދުނު އެކުލަވާލި ހޮސްޕިޓަލުގެ ރިޕޯޓުތަކުން ކަމަށެވެ.

މި ބިންހެލުމާއި ގުޅިގެން ވެއްޓިފައިވާ އިމާރާތްތަކުގެ ދަށުގައި ތާށިވެފައި ތިބި މީހުން ސަލާމަތް ކުރުމަށް ކުރާ މަސައްކަތުގެ ވީޑިއޯތަކާއި ވެއްޓިފައިވާ އިމާރާތްތަކުގެ ފޮޓޯތައް މީސް މީޑިއާ ޕްލެޓްފޯމް އެކްސްގައި ހިއްސާކޮށްފައެވެ. އެ ވީޑިއޯތަކާއި ފޮޓޯތައް ރޮއިޓާސް އަށް އަދި ކަށަވަރު ކުރެވޭ ގޮތް ނުވާ ކަމަށްވެސް ރިޕޯޓްތައް ބުނެއެވެ.