ލުބުނާނުގައި އިސްރާއީލުން ހިޒްބުﷲއާ ދެކޮޅަށް ކުރަމުންދާ ހަނގުރާމައާ ގުޅިގެން، އެމެރިކާގެ ރައީސް ޑޮނަލްޑް ޓްރަމްޕް ހުށަހެޅުއްވި ހުށަހެޅުމަށް ސީރިއާގެ ރައީސް އަޙްމަދު އަލް-ޝާރާ ދެކޮޅު ހައްދަވައިފިއެވެ.
މިކަމާ ގުޅޭގޮތުން އަލް-ޝާރާ ވިދާޅުވީ، ސީރިއާގެ އަމާޒަކީ މިހާރު އެގައުމު އަލުން ބިނާކޮށް، ބައިނަލްއަގްވާމީ މައިދާނުގައި ޝަރުއީ ހައިސިއްޔަތު ހޯދުން ކަމަށެވެ. އަދި ގިނަ އަހަރުތަކެއް ވަންދެން ކުރި ދާޚިލީ ހަނގުރާމައަށްފަހު، ގައުމަށް އާ ހަމަނުޖެހުންތަކެއް އަތުވެދާނެ އެއްވެސް ކަމަކުން ދުރުހެލިވުމަށް ސީރިއާއިން މަސައްކަތް ކުރަމުންދާ ކަމަށްވެސް އޭނާ ފާހަގަކުރެއްވިއެވެ.
ސީރިއާގެ ވެރިކަމަށް އައި ބަދަލާއެކު، ގައުމުގެ މަސްލަހަތު ހިމާޔަތްކުރުމަށް އިސްކަންދެއްވާނެ ކަމަށް އަލް-ޝާރާ ވަނީ ވިދާޅުވެފައެވެ. އިސްރާއީލުން ލުބުނާނަށް ދެމުންދާ ހަމަލާތަކުގެ ސަބަބުން ސަރަހައްދީ މަސްރަހު ނުތަނަވަސްވެފައިވާ މި ދަނޑިވަޅުގައި، ސީރިއާއިން ބޭނުންވަނީ އިތުރު ހަނގުރާމައެއްގެ ތެރެއަށް ނުވަދެ ގައުމު ހަމަޖެއްސުމަށެވެ.
ގިނަ އަހަރުތަކެއް ވަންދެން ސީރިއާގައި ކުރިއަށް ދިޔަ ދާޚިލީ ހަނގުރާމަ ނިމުމަކަށް ވަނީ އައިސްފައެވެ.
