ސަހްޔޫނީނުން ބޮޑެތި ލާއިންސާނީ އަނިޔާތަކެއް ދިނުމަށްފަހު އެކަހެރި ސަރަހައްދަކަށް އެއްލާލާފައި އޮތް ފަލަސްތީނުގެ އުމުރުން ދުވަސްވީ މީހަކު ފެނި، މުޅި ޣައްޒާގެ ހިތްތަކަށް ބޮޑު ރިހުމެއް ގެނުވައިފިއެވެ.
ޣައްޒާގެ "ޔެލޯ ލައިން" ކައިރިން މި މީހާ ފެނިފައިވަނީ ހޭނެތިފައި އޮއްވައެވެ. ސިވިލް ޑިފެންސް ޓީމުތަކުން އޭނާ ސަލާމަތްކޮށްގެން ހޮސްޕިޓަލަށް ގެންދިޔައިރު، އޭނާގެ ހަށިގަނޑުން ފެންނަން ހުރީ ހިތްފަޅައިގެންދާ ފަދަ އަސަރުގަދަ މަންޒަރުތަކެކެވެ. މީސްމީޑިއާގައި ދައުރުވަމުންދާ ފޮޓޯތަކުން ފެންނަ ގޮތުގައި، ހޮސްޕިޓަލުގެ ސްޓްރެޗާއެއްގައި އޮތް އެ ނާޒުކު ހަށިގަނޑުގައި ބޮޑެތި ޒަޚަމްތަކާއި، ޖިސްމާނީ ގޮތުން ދީފައިވާ ލާއިންސާނީ އަނިޔާތަކުގެ ނިޝާންތައް ވަރަށް ސާފުކޮށް ފެންނަން ހުއްޓެވެ.
ލޯކަލް ރިޕޯޓްތަކާއި އެކްޓިވިސްޓުން ހާމަކުރާ ގޮތުގައި، އިސްރާއީލު ސިފައިން އޭނާ ދޫކޮށްލާފައިވަނީ ގިނަ ދުވަސްތަކެއް ވަންދެން ބަންދުކޮށް، ބޮޑެތި އަނިޔާތަކެއް ދިނުމަށްފަހުގައެވެ. ރެސްކިއު ވޯކަރުން ބުނި ގޮތުގައި އޭނާ ފެނުނުއިރު އޮތީ މަރުގެ ތުންފަތްމަތީގައެވެ. އޭނާ ތަހައްމަލު ކުރަމުންދިޔަ ވޭނާއި، ވަރުބަލިކަން އޭނާގެ މޫނުމަތިން ފެންނަން ހުރީ އިންތިހާއަށެވެ.
މި ހާދިސާއާ ގުޅިގެން މުޅި ދުނިޔޭގެ ސަމާލުކަން މިވަނީ ޣައްޒާއަށް ހުއްޓިފައެވެ. ގިނަ ބަޔަކު ބުނަމުންދަނީ މިއީ މީހެއްގެ ބައްޕައެއް، ނުވަތަ ކާފައެއް ކަމަށާއި، މިފަދަ ނާޒުކު އުމުރެއްގެ މީހަކަށް ދީފައިވާ މި އަނިޔާއަކީ އިސްރާއީލުގެ ރަހުމެއް ނެތް އަމަލުތަކުގެ ދިރިހުރި މިސާލެއް ކަމަށެވެ.
އިންސާނީ ހައްގުތަކަށް ވަކާލާތުކުރާ ޖަމާއަތްތަކުން މިހާރު ދަނީ މިކަން މިނިވަންކަމާއެކު ތަހުގީގު ކުރުމަށް ގޮވާލަމުންނެވެ. އަދި އާންމު ރައްޔިތުންނާއި، ހާއްސަކޮށް އުމުރުން ދުވަސްވީ މީހުންނަށް އަމާޒުކޮށް ހިންގާ މިފަދަ ޖަރީމާތައް ހުއްޓުވުމަށް ބައިނަލްއަގުވާމީ މުޖުތަމައަށް ވަނީ ގޮވާލާފައެވެ.
ކޮންމެ ތަސްވީރެއްގެ ފަހަތުގައި އިންސާނީ ފުރާނައެއް ވާއިރު، މި އުމުރުން ދުވަސްވީ މީހާގެ ހާލަތުން ހާމަވަނީ ފަލަސްތީނުގެ ރައްޔިތުން ކޮންމެ ދުވަހަކު އުފުލަމުންދާ ކެކުޅުމާއި ތަކުލީފެވެ. އޭނާގެ ފުރާނަ ސަލާމަތް ކުރުމަށް މެޑިކަލް ޓީމުތަކުން މިހާރު ދަނީ ހުއްޓުމެއްނެތި މަސައްކަތް ކުރަމުންނެވެ.
