ސަހްޔޫނީން ޣައްޒާއަށް އެހީ ފޯރުކޮށްދިނުން ވަރަށް ބޮޑަށް މަދުކޮށް، ރަފާހް ކްރޮސިން ނުހުޅުވާނެ ކަމަށް ބުނެފިއެވެ.

ސަހްޔޫނީން އދ. އަށް ބުނީ މިއަދުން ފެށިގެން ޣައްޒާއަށް ވަންނަން ހުއްދަ ދޭނީ ދުވާލަކު 300 އެހީ ޓްރަކް ކަމަށެވެ. މިއީ ޣައްޒާއަށް ދުވާލަކު ވައްދަން އެއްބަސްވެފައިވާ މިންވަރަށް ވުރެ ދެބައިކުޅަ އެއްބައި ދަށް އަދަދެކެވެ.

ޣައްޒާގައި ހުންނަ އދ.ގެ އޮފީސް ފޯ ދަ ކޯޑިނޭޝަން އޮފް ހިއުމެނިޓޭރިއަން އެފެއާޒް (އޯސީއެޗްއޭ) ގެ ތަރުޖަމާން އޮލްގާ ޗެރެވްކޯ ވިދާޅުވީ، ޣައްޒާއަށް އެހީ ފޯރުކޮށްދިނުން ބެލެހެއްޓުމުގެ ޒިންމާ އުފުލާ ސަހްޔޫނީންގެ އަސްކަރިއްޔާގެ ގޮފި ކަމަށްވާ ކޯޑިނޭޝަން އޮފް ގަވަމެންޓް އެކްޓިވިޓީސް އިން ދަ ޓެރިޓަރީސް (ކޯގަޓް) އިން އދ. އަށް ނޯޓެއް ލިބިފައިވާ ކަމަށެވެ.

ކޯގަޓްގެ ނޯޓުގައި ބުނެފައި ވަނީ އިންސާނީ އުމްރާނީ ތަރައްގީގެ ވަކި ހާއްސަ ބޭނުންތަކަކަށް ފިޔަވައި އެހެން އެއްވެސް ކަމަކަށް ތެލާއި ގޭހެއް ޣައްޒާއަށް ނުދެވޭނެ ކަމަށެވެ.

އަލްޖަޒީރާގެ ނޫސްވެރިޔާ ހާނީ މަހްމޫދު ބުނީ ދުވާލަކު 300 އެހީ ޓްރަކް ވެއްދުމަށް ހުއްދަ ދިން އިރު، މިއީ ޣައްޒާއަށް އެކަށީގެންވާ މިންވަރެއް ނޫން ކަމަށެވެ.

ސަހްޔޫނީން ވަނީ ޣައްޒާ އާއި މިސްރާއި ދެމެދު އޮންނަ ރަފާހް ބޯޑަރު ބަންދު ކުރަން ނިންމައިފައެވެ.

އަލްޖަޒީރާ އިން ބުނި ގޮތުގައި މި ދަތިކުރުމުގެ ފިޔަވަޅުތަކަށް އަމަލު ކުރަން ފަށާފައި ވަނީ ސަހްޔޫނީންގެ ސިފައިން ޣައްޒާގެ އުތުރާއި ދެކުނުގައި ފަލަސްތީނުގެ ނުވަ މީހަކު ޝަހީދުކުރިތާ ގަޑިއިރުތަކެއް ފަހުންނެވެ.