އިމާމް މަހްދީގެ ލަޝްކަރުކަމަށް ދައުވާ ކުރާ އަފްޣާނިސްތާން މިވީ މޯދީގެ ލަޝްކަރަކަށް ކަމަށް ޕާކިސްތާނުގެ ސީނިއަރ ޑިފެންސް އެނަލިސްޓެއް ވިދާޅުވެއްޖެއެެވެ.
އަފްޣާނިސްތާނުގައި ތިބި ހަނގުރާމަވެރިން އިންޑިއާގެ މޯދީ ސަރުކާރުގެ އަމުރަށް އަމަލުކުރާ ކަމަށް ޕާކިސްތާނުން ތުހުމަތު ކޮށްފައިވާއިރު ޕާކިސްތާނުގެ އެނަލިސްޓް ޚަވާޖާ އާސިފް ވިދާޅުވީ އިމާމް މަހްދީގެ ލަޝްކަރުކަމަށް ދައުވާ ކުރަމުން އައި މީހުން މިހާރު އިންޑިއާގެ އަމުރަށް ޚިދުމަތް ކުރަމުންދާ ކަމަށާއި، ޕާކިސްތާނުން މިކަން ކުށްވެރިކުރާ ކަމަށެވެ.
ޚަވާޖާ އާސިފް ފާހަގަކުރެއްވި ގޮތުގައި އިންޑިއާ އާއި އަފްޣާނިސްތާނުން ދާދި ފަހުން ދިފާއީ އެއްބަސްވުންތަކުގައި ސޮއިކޮށް ގުޅުންތައް ވަރުގަދަކޮށްފައިވާއިރު އެއީ ޕާކިސްތާނުން ދެކޭ ގޮތުގައި ބޯޑަރު ސަރަހައްދުގެ ސަލާމަތަށް ނުރައްކާވާ ކަމެކެވެ. އޭނާ ވިދާޅުވީ މި އާ ގުޅުންތަކުގެ ސަބަބުން ގައުމުތަކުގެ މެދުގައި އޮތް ސުލްހަ ނެތެމުންދާކަމަށާއި ޕާކިސްތާނުން މިކަން ގާތުން ބަލަމުންދާ ކަމަށެވެ.
އަފްޣާނިސްތާނުގެ ބިން ބޭނުންކޮށްގެން އިންޑިއާގެ ހަނގުރާމަވެރިން އެގައުމުގެ ސަރަހައްދަށް ހަމަލާތައް ދެމުންދާ ކަމަށް ޕާކިސްތާނުން ބުނެއެވެ. އަދި އިންޑިއާއިން މި އެއްބަސްވުންތަކާއި ގުޅުން ގާއިމުކުރަނީ ޕާކިސްތާނަށް ގެއްލުން ދިނުމަށް ކަމަށެވެސް ޕާކިސްތާނުން ބުނެއެވެ.
އިންޑިއާއިން ވަނީ އެ ވާހަކަ ދޮގުކޮށް، އެ ގައުމުން ތާއީދުކުރަނީ އަފްޣާނިސްތާނުގައި ސުލްހައާއި ތަރައްގީއަށް ކަމަށް ބުނެފައެވެ. އެކަމަކު ޕާކިސްތާނުން ބުނަނީ މިއީ ސީރިއަސް ކަމެއް ކަމަށާއި ބޯޑަރު ހުރަސްކޮށް އިތުރު ހަމަލާއެއް ދީފިނަމަ ހަރުކަށި ފިޔަވަޅު އަޅާނެ ކަމަށެވެ.
