އެމެރިކާގެ ނޭޝަނަލް ސެކިއުރިޓީ އެޖެންސީން ޗައިނާގެ ގައުމީ ޓައިމް ސެންޓަރަށް ސައިބާ ހަމަލާތަކެއް ދީފައިވާ ކަމަށް އެ ގައުމުން ތުހުމަތުކޮށްފިއެވެ.

ޗައިނާއިން މި ތުހުމަތުކުރީ އެކަމާ ގުޅިހުންހުރި ތަހުގީގަކަށް ފަހު ކަމަށް އެ ގައުމުން ހާމަކޮށްފައިވެއެވެ.

ޗައިނާއިން ބުނީ އެމެރިކާއިން ދިން މި ހަމަލާގެ ސަބަބުން ވަސީލަތްތަކަށް ލިބުނު ގެއްލުމަކުން ނެޓްވޯކް މުވާސަލާތާއި މާލީ ނިޒާމުތަކާއި ކަރަންޓް ސަޕްލައިއަށް ބުރޫ އަރާފާނެ ކަމަށެވެ.

ޗައިނާގެ މިނިސްޓްރީ އޮފް ސްޓޭޓް ސެކިއުރިޓީން ކުރި ޕޯސްޓެއްގައި ބުނީ އެމެރިކާގެ އެޖެންސީން 2022 ވަނަ އަހަރު ނޭޝަނަލް ޓައިމް ސާވިސް ސެންޓަރުގެ މުވައްޒަފުންގެ ޑިވައިސްތަކުން ނާޒުކު މައުލޫމާތު ވަގަށް ނަގާފައިވާ ކަމަށް ތުހުމަތު ކުރެވޭ ކަމަށެވެ. އެމެރިކާއިން މިކަން ކުރީ ބޭރުގެ މޯބައިލް ފޯނު ބްރޭންޑެއްގެ މެސެޖިން ސާވިސްގައި ހުރި ނާޒުކު މައުލޫމާތި ބޭނުންކޮށްގެން ކަމަށް އެ މިނިސްޓްރީން ވަނީ ބުނެފައެވެ. ނަމަވެސް، އެއީ ކޮން ބްރޭންޑެއް ކަމެއް އަދި އެނގިފައެއް ނުވެއެވެ.

އަދި އެމެރިކާގެ އެޖެންސީން 42 ވައްތަރެއްގެ "ހާއްސަ ސައިބާ ހަމަލާގެ ހަތިޔާރު" ބޭނުންކޮށްގެން އެ ސެންޓަރުގެ އެތައް އެތެރޭގެ ނެޓްވޯކް ނިޒާމުތަކަސް އަމާޒުކޮށް، 2023 އާއި 2024 އާ ދެމެދު ކީ ޓައިމިން ނިޒާމަކަށް ވަންނަން މަސައްކަތް ކުރި ކަމަށް ވެސް އެ މިނިސްޓްރީން ބުނެއެވެ.

މި މައްސަލައާއި ގުޅިގެން އެމެރިކާއިން ރަސްމީ ބަހެއް ބުނެފައިނުވެއެވެ.