ސަހްޔޫނީނުން އަނެއްކާވެސް ޣައްޒާއަށް ބޮން އަޅަން ފަށައި، ހަނގުރާމަ ހުއްޓާލުމުގެ އެއްބަސްވުން 48 ވަނަ ފަހަރަށް މުގުރާލައިފިއެވެ. މިއަދު ހެނދުނުގެ ވަގުތެއްގައި ސަހްޔޫނީ ސިފައިން (އައިޑީއެފް) އިން ޣައްޒާއަށް ވައިގެ ހަމަލާތަކެއް ދީ ވަނީ ޣައްޒާ ރައްޔިތުންނަށް ލިބުނު މިނިވަންކަން ނިގުޅައިގަނެފައެވެ.
ޣައްޒާގެ ރައްޔިތުން ބުނާ ގޮތުގައި މި ހަމަލާތަކުގައި ގިނަ ގެތަކާއި އިމާރާތްތަކަށް ގެއްލުން ލިބިފައިވާއިރު، މުޅި ޣައްޒާގައި އަޑުގަދަ ގޮވުންތަކުގެ އަޑުން އާއިލާތައް އަނެއްކާވެސް ބިރުވެރިކަމުގެ ތެރެއަށް ވަނީ ވެއްޓިފައެވެ.
ބިމާއި ހަމަވެފައިވާ އިމާރާތްތަކުގެ ދަށުގައި ތާށިވެފައި ތިބި މީހުންނަށް އެހީތެރިވުމަށް ރެސްކިއު ޓީމުތަކުން ދަނީ މަސައްކަތް ކުރަމުންނެވެ.
މި އާ ހަމަލާގެ ސަބަބުން ޣައްޒާގެ ހާލަތު އިތުރަށް ގޯސްވެފައިވާއިރު، މިހާރުވެސް ރައްޔިތުންނަށް ކާނާއާއި ސާފު ފެނާއި ބޭސް ނުލިބުމުގެ މައްސަލަތައް ކުރިމަތިވެފައިވާ ދަނޑިވަޅުގައި ބަނޑުހައިހޫނުކަން އިތުރުވެދާނެ ކަމުގެ ބިރު އަންނަނީ ފެތުރެމުންނެވެ.
އެމެރިކާގެ ރައީސް ޓްރަމްޕް ހެދި ސުލްހައިގެ އެއްބަސްވުމުގެ ދަށުން ސަހްޔޫނީން ހަނގުރާމަ ހުއްޓާލިކަމަށް އިއުލާންކުރިފަހުން ޣައްޒާއަށް ހަމަލާދީ ވަނީ ސުލްހައިގެ އެއްބަސްވުމަކަށް ދުވަހަކުވެސް ޔަހޫދީން އިހުތިރާމް ނުކުރާނެކަން ސާބިތުކޮށްދީފައެވެ.
މި ހަމަލާތަކާއި ގުޅިގެން ބައިނަލްއަގްވާމީ ޖަމިއްޔާތަކުން އަންނަނީ ސަހްޔޫނީން ކުށްވެރިކޮށް ހަނގުރާމަ ހުއްޓާލުމަށް ގޮވަމުންނެވެ. އަދި އެއްބަސްވުމާއި ޚިލާފުވުމުން ޓްރަމްޕްއަށްވެސް ފާޑުކިޔުން އަންނަނީ އަމާޒުވަމުންނެވެ.
