އިނގިރޭސިވިލާތުގެ ބޭންކެއްގައި ހުރި ވެނެޒުއޭލާގެ 1.8 ބިލިއަން ޑޮލަރުގެ ރަން އެ ގައުމަށް ނުދީ ހިފަހައްޓައިފިއެވެ.
އިނގިރޭސިވާތުން މި ރަން ދޭން ދެކޮޅު ހަދަނީ މީގެ ހަތަރު އަހަރު ކުރިން އެމެރިކާ އާއި އިނގިރޭސިވިލާތުން ވެނެޒުއެލާގެ "ވަގުތީ ރައީސް" ކަމުގެ މަގާމަށް ޖުއާން ގުއައިޑޯ އަށް ތާއީދު ކުރިއިރު، ވެނެޒުއެލާގެ ރައްޔިތުން އޭނާ އިންތިހާބު ނުކުރުމުންނެވެ.
އެކަމުގެ ސަބަބުން އިނގިރޭސިވިލާތުން އެ ރަން އަނބުރާ މިހާރުގެ ވެނެޒުއޭލާގެ ސަރުކާރަށް ދިނުމަށް އަންނަނީ ދެކޮޅު ހަދަމުންނެވެ.
ވެނެޒުއެލާއިން ބުނަނީ އެ ރަން ނިސްބަތްވަނީ ބޭރު ޤައުމުތަކަށް ނޫންކަމަށާއި އެއީ ވެނެޒުއޭލާގެ ރައްޔިތުންގެ ހައްގެއް ކަމަށެވެ. ގިނަ ތަޖުރިބާކާރުން ބުނާ ގޮތުގައި އެމެރިކާއިން އަބަދުވެސް ފައިސާ އާއި ދަތިކުރުމުގެ ފިޔަވަޅުތައް ބޭނުންކޮށްގެން އެމެރިކާގެ އަމުރުތަކަށް އަމަލު ނުކުރާ ގައުމުތައް އަންނަނީ ކޮންޓްރޯލް ކުރަމުންނެވެ.
އެގޮތުން މިއީ އިނގިރޭސިވިލާތާއި އެމެރިކާއިން ކުރާ އިގްތިސާދީ ބުލީއެއް ކަމަށް ވެނެޒުއޭލާގެ ސަރުކާރުން ސިފަކުރެއެވެ.
މީގެ އިތުރުން، މި ހާލަތުގެ ސަބަބުން ދުނިޔޭގެ ބޭންކުތަކަށް ކުރާ އިތުބާރަށް ވެސް ގެއްލެމުން ދާކަމަށް އެ ގައުމުން ބުނެއެވެ. ހުޅަނގުގެ މުއްސަނދި ޤައުމުތަކުން ބޭނުން ވަގުތެއްގައި އެހެން ޤައުމުތަކުގެ މުދާ ފްރީޒްކުރެވިއްޖެނަމަ، ދެން ޤައުމުތަކުން ކުރިއަށް އޮތްތަނުގައި ހުޅަނގުގެ ބޭންކުތައް ބޭނުން ކުރުން ހުއްޓާލާނެ ކަމުގެ އިންޒާރުވެސް ދީފައިވެއެވެ.
ވެނެޒުއެލާގެ ރައްޔިތުން ދަނީ އެމީހުންގެ ރަން އަނބުރާ ހޯދުމަށް ޑިމާންޑް ކުރަމުންނެވެ. އެމީހުން ބުނާ ގޮތުގައި މި ފައިސާއިން އިގްތިސާދަށް އެހީތެރިވެދީ، ކާނާ އާއި ބޭސް ގަނެ، އާއިލާތަކަށް އެހީތެރިވެދެވޭނެ އެވެ. އެކަމަކު އެމެރިކާގެ ނުފޫޒުގެ ސަބަބުން އިނގިރޭސިވިލާތުން އަދިވެސް އެ ރަން އަނބުރާ ދިނުމަށް އަންނަނީ ދެކޮޅު ހަދަމުންނެވެ. ގިނަ ބަޔަކު ގަބޫލުކުރާ ގޮތުގައި މިއީ އެމެރިކާއިން މިނިވަން ގައުމުތަކަށް އަދަބު ދިނުމަށް ބާރު ބޭނުންކުރުމުގެ އަނެއް މިސާލެވެ.
