އިންޑޮނޭޝިއާގެ ޖަކާޓާގެ މިސްކިތަކަށް އަމާޒުކޮށް ދިން ބޮމުގެ ހަމަލާއެއްގައި 50 އަށް ވުރެ ގިނަ މީހުން ޒަޚަމްވެފައިވާ ކަމަށް އެ ގައުމުން ރިޕޯޓްކޮށްފިއެވެ.
މި ހާދިސާ ހިނގާފައިވަނީ ޖަކާޓާގައި ހުންނަ ސުކޫލެއްގެ މިސްކިތެއްގައި ކަމަށް މައުލޫމާތު ލިބިފައިވެއެވެ.
މި ހާދިސާ ހިނގުމާއެކު ސުކޫލުގައި ތިބި ހުރިހާ އެންމެން ވަނީ އިމާރާތުން ބޭރުކޮށް އަނިޔާ ލިބުނު މީހުން އަވަސް ފަރުވާއަށް ފޮނުވާލައިފައިވެއެވެ.
މި ހަމަލާދީފައިވަނީ އެ މިސްކިތުގައި ނަމާދު ވަގުތާއި ދިމާކޮށް ނަމާދުކުރަން ފެށިތަނުން ކަމަށް ސްކޫލުން މައުލޫމާތުދެއެވެ.
ޖަކާޓަގެ ފުލުހުންގެ ތަރުޖަމާނު ބުދި ހާމަންޓޯ ބުނެފައިވަނީ ގާތްގަނޑަކަށް 54 މީހަކަށް އަނިޔާ ވެފައިވާއިރު 33 މީހަކަށް އަދިވެސް ދަނީ ފަރުވާދެމުން ކަމަށެވެ.
މީގެ އިތުރުން، މި ހަމަލާގެ ތުހުމަތު އެ ސްކޫލުގެ ދަރިވަރަކަށް ފުލުހުން ކޮށްފައިވާއިރު އެ ދަރިވަރަށް އަނިޔާވެ މިހާރު ސާޖަރީއެއް ކުރުމަށް ވައްދާފައިވާކަމަށްވެސް ފުލުހުން ބުންޏެވެ.
މި ހަމަލާއަކީ ޓެރަރިޒަމް ހަމަލާއެއްކަމަށް އަދި ނިންމާފައިނުވާ ކަމަށާއި މި މައްސަލަ އިތުރަށް ތަހުގީގު ކުރަމުން އަންނަ ކަމަށްވެސް ފުލުހުން ބުނެފައިވެއެވެ.
