އޮސްޓްރޭލިއާގެ މަޖިލިސް މެންބަރު ޕޯލީން ހެންސަން "ބުރުގާ" އަށް މަލާމާތްކޮށްފިއެވެ.

ހެންސަން ވަނީ ކަޅު ބުރުގާ އަޅައިގެން ސެނެޓް ޗެމްބަރަށް ވަދެވަޑައިގަނެފައެވެ. މިކަމުގެ ސަބަބުން މެންބަރުންގެ ފާޑުކިޔުންތައް އަމާޒުވެ ޖަލްސާ މެދުކަޑާލަން މަޖުބޫރުވެ، ހެންސަން ޗެމްބަރުން ބޭރުކުރުމަށް މެންބަރުން ދިޔައީ ގޮވަމުންނެވެ.

ހެންސަން ބުނީ އޭނާ ބުރުގާ އަޅައިގެން ދިޔައީ މުސްލިމް އަންހެނުން ސަގާފީ އަދި ދީނީ ގޮތުން އަޅައިގެން އުޅޭ އެ ހެދުން (މޫނުބުރުގާ) މަނާކުރުމަށް ހުށަހެޅުމަށް ބާރުއެޅުމަށެވެ. އޭނާގެ ހުށަހެޅުން ބަލައިނުގަނެ، ގިނަ ގާނޫނު ހަދާ މަޖިލީހުގެ މެމްބަރުން ސިފަކުރެއްވީ އެ އަމަލަކީ އިހުތިރާމް ކުޑަ އަދި މެންބަރެއްގެ ފަރާތުން ފެނިގެންނުވާނެ ފަދަ އަމަލެއްކަމަށެވެ.

މީގެ އިތުރުން، އޭނާގެ އަމަލުތައް އަމާޒުކޮށްފައިވަނީ މުސްލިމް އަންހެނުންނަށް ކަމަށާއި މިއީ ގެއްލުން ހުރި ސްޓިރިއޯޓައިޕްތަކަށް ހިތްވަރުދޭ ކަމެއް ކަމަށް މެންބަރުން ބުނެއެވެ. ގިނަ ބަޔަކު ފާހަގަކުރި ގޮތުގައި މުސްލިމް ޖަމާއަތްތަކަށް މިހާރުވެސް ތަފާތުކުރުންތައް ކުރިމަތިވެފައިވާއިރު، މިފަދަ ސިޔާސީ ސްޓަންޓްތަކުގެ ސަބަބުން އެމީހުންނަށް ކުރިމަތިވާ ޕްރެޝަރާއި ބިރުވެރިކަން އިތުރުވެގެންދެއެވެ.

މުސްލިމުންގެ ހައްގުގައި ވަކާލާތުކުރާ ޖަމާއަތްތަކުން ވެސް ވަނީ މިކަން ކުށްވެރިކޮށް، އެއީ އަންހެނުންގެ އަގީދާއާ އެއްގޮތަށް ހެދުން އެޅުމުގެ ހައްގަށް އަރައިގަތުން ކަމެއް ކަމަށް ބުނެފަ އެވެ. އެމީހުން ވަނީ ސިޔާސީ ބަހުސްތަކުގައި މުސްލިމް އަންހެނުން ޕްރޮޕްގެ ގޮތުގައި ބޭނުން ނުކުރުމަށް ބާރުއަޅައި އިހުތިރާމް ދެއްކުމަށް ގޮވާލާފައެވެ.

މި މައްސަލަ ބޮޑުވެފައިވީ ނަމަވެސް އޮސްޓްރޭލިއާގެ ގިނަ ރައްޔިތުން ވަނީ މުސްލިމް އަންހެނުންނަށް ތާއީދުކޮށް ވާހަކަ ދައްކައި، ހެންސަންގެ އަމަލުތަކާ ދެކޮޅު ހަދައި، އެއްބައިވަންތަކަމަށް ހިތްވަރުދީފަ އެވެ.