އިންޓަނޭޝަނަލް އެއިޑް ކެމްޕެއިން (އައިއޭސީ)އަށް ގިނަ ޚިދުމަތްތަކެއް ކޮށްދެއްވި "އަލްޚައިރް ފައުންޑޭޝަން"ގެ ޑިރެކްޓަރެއް އިޒްރާއީލުން ޝަހީދުކޮށްލައިފިއެވެ.

ފަލަސްތީނުގެ ޣައްޒާގެ ދެކުނުގައި އޮންނަ އަވަށެއް ކަމަށްވާ ޚާން ޔޫނިސްގައި ހުންނަ "އަލްޚައިރް ފައުންޑޭޝަން"ގެ އޮފީހަށް އިޒްރާއިލުން ދިން ސީދާ ހަމަލާއެއްގައި ޝަހީދުވެފައިވަނީ އެ ޖަމްއިއްޔާގެ ގްރައުންޑް ޑިރެކްޓަރ ހިސާމް މަންސޫރެވެ. ހިސާމް މަންސޫރަކީ ޣައްޒާގެ ގެތަކުގެ މަރާމަތާއި ހަވާލުވެ އެކަންކަން އިންތިޒާމްކޮށް ހިންގުމާއި ހަވާލުވެ ހުންނެވި ފަރާތެވެ.

އަައިއޭސީއިން ހާމަކޮށްފައިވާ ގޮތުގައި އެ ޖަމްއިއްޔާއާ އެކު 2018 ވަނަ އަހަރުން ފެށިގެން އެތައް ގިނަ މަޝްރޫޢުތަކެއްގައި ހިސާމް ވަނީ މަސައްކަތްކޮށްދެއްވާފައެވެ. ހިސާމް ޝަހީދުކޮށްލި ހަމަލާ އިޒްރާއިލުން ދިން ވަގުތަކީ ގިނަ މުވައްޒަފުން އެކި ހިސާބުތަކުގައި އެހީ ބެހުމުގެ މަސައްކަތުގައި އުޅުނު ވަގުތެކެވެ.

އައިއޭސީއިން ހާމަކޮށްފައިވާ ގޮތުގައި އިޒްރާއީލުގެ އެ ހަމަލާއިން ދިމާވި ހިތާމަވެރި ހާދިސާގެ ސަބަބުން ޣައްޒާއަށް އެހީވުމަށް އިތުރު ރޫޙަކާއި ހިތްވަރެއް ލިބުންނޫންކަމެއް ނުވާނެކަމަށާ އެފަދަ ހަމަލާތަކުގެ ސަބަބުން އެ ޖަމްއިއްޔާއިން ކުރަމުން އަންނަ މަސައްކަތުގައި ފަހަތަށް ޖެހި ހުއްޓުުން ނާރާނެ ކަމަށެވެ.

"މާތްﷲ އަޅުގަނޑުމެންގެ އަޚް ހިސާމް މަންސޫރްގެ ފާފަ ފުއްސަވާ، ޝަހީދެއްގެ ދަރަޖަ ދެއްވާ، ސުވަރުގޭގެ މަތިވެރި ނިޢުމަތް މިންވަރު ކުރައްވާށި!" އައިއޭސީއިން ފޭސްބުކްގައި ކުރި ޕޯސްޓުގައިވެއެވެ.