ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިންޑިއާއަށް ވަޑައިގަންނަވާނެ ތާރީހެއް އަދި އެ ދަތުރުގެ މަގުސަދެއް ސަރުކާރުގެ އިސް ތަރުޖަމާނު ހީނާ ވަލީދަށް މިއަދުގެ ނޫސްވެރިންގެ ބައްދަލުވުމުގައި ވިދާޅެއްނުވެވުނެވެ.
ނޫސްވެރިއެއް ކުރި ސުވާލަކަށް ޖަވާބު ދެއްވަމުން ހީނާ ވިދާޅުވީ އެ ދަތުރުގައި ރައީސް ވަޑައިގަންނަވާނީ ދެ ގައުމުގެ ވެރިންނަށް ވެސް ފަސޭހަ ވަގުތެއްގައި ކަމަށެވެ. އަދި ވިދާޅުވީ ދެ ގައުމުގެ ގުޅުން ބަދަހިވެފައިވާ ހުރިހާ ދާއިރާއަކުން އެ ދަތުރުގައި މަޝްވަރާ ކުރާނެ ކަމަށެވެ.
ރައީސް މުއިއްޒު އިންޑިއާއަށް ވަޑައިގަތުމަށް ހަމަޖެހިފައިވާ ކަމަށް ހީނާ ވިދާޅުވީ ސެޕްޓެމްބަރު 10، ގަ އެވެ.
އިންޑިއާ ސަރުކާރުގެ ބައެއް އޮފިޝަލުންނާ ހަވާލާދީ ބްލޫމްބާގް ނޫހުގައި ލިޔެފައި ވަނީ ރައީސް މުއިއްޒު އިންޑިއާއަށް ކުރައްވާ ދަތުރުގައި ރާއްޖެ މާލީ އެހީ ހޯއްދަވަން މަސައްކަތް ކުރައްވާނެ އެވެ.
ކުރިން ވާހަކަ ދެކެވުނު ކަރަންސީ ސްވޮޕުގެ އިތުރުން 2019 ވަނަ އަހަރު އެއްބަސްވެފައިވާ ލައިން އޮފް ކްރެޑިޓުގެ ދަށުން ރާއްޖެއަށް ފައިސާ ދޫކުރަން ތައްޔާރަށް އިންޑިއާ އޮތް ކަމަށް ވެސް ބްލޫމްބާގުން ބުނެ އެވެ.
