ނިރުބަވެރި ސަހްޔޫނީން ޣައްޒާއަށް ދިން އެންމެ ފަހުގެ ހަމަލާތަކުގައި ފަލަސްތީނުގެ އިތުރު 20 މީހަކު ޝަހީދުވެއްޖެއެވެ.

މި ހަމަލާތަކުގެ ސަބަބުން މިދިޔަ އަހަރުގެ އޮކްޓޯބަރު މަހުގެ ހަތްވަނަ ދުވަހުން ފެށިގެން ޝަހީދުވި މީހުންގެ އަދަދު ސާޅީސް އެއްހާހާއި ފަސްސަތޭކައަށްވުރެ މައްޗަށް އަރައެވެ.

ސަހްޔޫނީންގެ އަސްކަރިއްޔާއިން ވަނީ މި ފަހުން ބެއިރޫތަށް ނުރައްކާތެރި ވައިގެ ހަމަލާތަކެއް ދީ، މީހުން ދިރިއުޅޭ ހަ ޓަވަރު ހަލާކުކޮށްފައެވެ. އަދި މި ހަމަލާތަކުގައި ހަ މީހުން މަރުވެ، ސަތޭކައަށް ވުރެ ގިނަ މީހުން ޒަހަމްވެފައިވާ ކަމަށް ރިޕޯޓްތަކުން ދައްކައެވެ.

ސަހްޔޫނީން އަންނަނީ ދުވަހެއް ދުވަހަކަށްވުރެ އެ ގައުމުން ދެމުން އަންނަ ހަމަލާތައް ވަރުގަދަ ކުރަމުންނެވެ.

މީގެ އިތުރުން ފަލަސްތީނުގެ އާންމުން އުޅޭ ސަރަހައްދުތަކާއި ސްކޫލް ފަދަ ތަންތަނަށް ހަމަލާ ގިނަ ކަން ފާހަގަކުރެވެއެވެ.