އެފްރިކާގެ އެންމެ މޮޅު ރެފްރީގެ ގޮތުގައި މަޝްހޫރުވެފައިވާ ސޯމާލިއާގެ ރެފްރީއަށް، އެ ގައުމުގެ އެއާޕޯޓުން ބަޠަލެއްގެ ދަރަޖައިގައި ހޫނު މަރުހަބާއެއް ކިޔައިފިއެވެ. އޭނާއަށް މިފަދަ މަރުހަބާއެއް ކިޔާފައިވަނީ 2026 ވަނަ އަހަރުގެ ވޯލްޑް ކަޕަށް ތައްޔާރުވުމުގެ ގޮތުން އެމެރިކާއަށް ދިއުމަށް ކުރި މަސައްކަތުގައި، އެމެރިކާ ސަރުކާރުން އޭނާއަށް އެ ގައުމަށް އެތެރެވުމުގެ ހުއްދަ (ވިސާ) ދިނުމަށް އިންކާރު ކުރުމާ ގުޅިގެންނެވެ.
އެމެރިކާގެ މި ނިންމުމާ ގުޅިގެން ސޯމާލިއާގެ ރައްޔިތުންނާއި ދުނިޔޭގެ އެކި ކަންކޮޅުތަކުގައި ތިބި ސޯމާލިއާގެ ރައްޔިތުން އަންނަނީ އޭނާއަށް ބޮޑު ތާއީދެއް އޮތްކަން ހާމަކުރަމުންނެވެ. މިގޮތުން، ވިސާ ނުލިބުމުގެ ސަބަބުން އޭނާއަށް ގެއްލިގެންދާނެ އާމްދަނީ ފޫބެއްދުމަށްޓަކައި ސޯމާލިއާގެ މަހުޖަނަކު ވަނީ 100,000 އެމެރިކާ ޑޮލަރު ދިނުމަށް ވައުދުވެފައެވެ.
މީގެ އިތުރުން، އެމެރިކާގައި ދިރިއުޅޭ ސޯމާލިއާގެ ޖަމާއަތްތަކުން (ޑައިސްޕޯރާ) ބުނެފައިވަނީ، މި ރެފްރީއަށް ތާއީދުކޮށް އަދި އޭނާއަށް އެހީތެރިވުމުގެ ގޮތުން އެއް މިލިއަން ޑޮލަރު ހޯދުމަށް ހާއްސަ ހަރަކާތްތަކެއް ރާވާފައިވާ ކަމަށެވެ.
މި ރެފްރީއަށް އެއާޕޯޓުން މަރުހަބާ ކިޔުމަށް ގިނަ އަދަދެއްގެ އާންމުންނާއި ކުޅިވަރުގެ ދާއިރާގެ އިސް ބޭފުޅުން އެއްވި އިރު، މިއީ އެމެރިކާގެ ނިންމުމާ ދެކޮޅަށް ސޯމާލިއާގެ ރައްޔިތުން ދެއްކި އެއްބައިވަންތަކަމުގެ ނަމޫނާއެއްގެ ގޮތުގައި ގިނަ ބަޔަކު ސިފަކުރެއެވެ.
