ޓެރަރިޒަމްގެ ހަމަލާއެއް ދިނުމުގެ ބިރު އޮތް ކަމަށް ބުނެ ރާއްޖެއަށް ދަތުރުކުރުމަށް އިނގިރޭސިވިލާތުން އެޑްވައިޒަރީ ނެރެފިއެވެ.

އިނގިރޭސިވިލާތުން މިއަދު އެ ގައުމުގެ ރައްޔިތުންނަށް އަމާޒުކޮށް ނެރުނު ޓްރެވަލް އެޑްވައިޒަރީ ގައި ބުނެފައިވަނީ އެ ގައުމުގެ ރައްޔިތުންނާ ދެކޮޅަށް ހަމަލާ ދިނުމަށް ބައެއް ޓެރަރިސްޓު ޖަމާއަތްތަކުން ގޮވާލާފައިވާ ކަމަށެވެ.

އެހެންކަމުން، އިނގިރޭސިވިލާތުގެ ރައްޔިތުންނާ ދެކޮޅަށް ރާއްޖޭގައި ވެސް ހަމަލާއެއް ދީފާނެ ކަމަށް އިނގިރޭސިވިލާތުގެ ފޮރިން އޮފީހުން ނެރުނު އެޑްވައިޒަރީގައި ވެއެވެ. ފޮރިން އޮފީހުން ބުނީ އެ ގައުމުގެ ރައްޔިތުންނާ ދެކޮޅަށް ރާއްޖޭގައި ޓެރަރިޒަމްގެ ހަމަލާއެއް ނުދޭނެ ކަމަށް ޔަގީންކަން ނުދެވޭނެ ކަމަށެވެ. އެހެންކަމުން ރާއްޖެއަށް ދަތުރުކޮށް އުޅުމުގައި ހުރިހާ ފަތުރުވެރިންވެސް އެމީހުންގެ އަމިއްލަ ރައްކާތެރިކަން ކަށަވަރުކޮށް އަދި ރާއްޖޭގެ ގާނޫނުތަކާ ގަވާއިދުތަކަށް ބޯ ލެނބުމަށް އިރުޝާދުދީފައިވެއެވެ.

އިނގިރޭސިވިލާތުން މިފަދަ އެޑްވައިޒަރީއެއް ނެރެފައިވަނީ އެ ގައުމުގެ ރައްޔިތުންނަށް ހަމަލާދޭން ގޮވާލާފައިވާތީއެވެ، އެފަދައިން ދުނިޔޭގެ އެކި ހިސާބުތަކުގައި ގޮވާލާފައިވަނީ އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގާ ނަސްލުހޭދު ކުރުމަށް އިނގިރޭސިވިލާތުން ތާއީދުކޮށް، އިޒްރޭލަށް ހަތިޔާރު ވިއްކާތީއެވެ.