އިނގިރޭސިވިލާތުން ސަހްޔޫނީންނާއިއެކު ކުރަމުންދާ މިނިވަން ވިޔަފާރީގެ އެއްބަސްވުމުގެ މަޝްވަރާތައް ހުއްޓާލައި ދަތިކުރުމުގެ ފިޔަވަޅުތައް އަޅަން ނިންމައިފިއެވެ.
ސަހްޔޫނީންގެ ސާބިތު އެކުވެރިއެއްކަމަށްވާ އިނގިރޭސިން ފާއިތުވި 48 ގަޑިއިރުގެ ތެރޭގައި ކުއްލިއަކަށް ރާގު ބަދަލުކޮށްލީ ބެންޖަމިން ނަތަންޔާހޫގެ ސަރުކާރުން ޣައްޒާއަށް އިންސާނީ އެހީތައް ވަނުން ގާތްގަނޑަކަށް މުޅިން ހުއްޓުވުމުންނެވެ.
އަންގާރަ ދުވަހު ހައުސް އޮފް ކޮމަންސް އިން ވާހަކަ ދައްކަވަމުން ފޮރިން ސެކްރެޓަރީ ޑޭވިޑް ލަމީ ވަނީ މި އިންޒާރުތަކަށް ތަބާވެ ސަހްޔޫނީންނާއި އެކު މިނިވަން ވިޔަފާރީގެ އެއްބަސްވުމުގެ މަޝްވަރާތައް ހުއްޓާލާފައިވާކަން އިއުލާން ކުރައްވާފައެވެ.
ހުޅަނގު އައްސޭރީގައި ވަޒަންވެރިވާ މީހުންނާ ދެކޮޅަށް އައު ދަތިކުރުމުގެ ފިޔަވަޅުތައް އެޅުމުގެ ސަބަބުން ލަންޑަނުގައި ހުންނަ ސަހްޔޫނީންގެ ސަފީރު ޒިޕީ ހޮޓޯވެލީވަނީ އިނގިރޭސި ފޮރިން އޮފީހަށްވެސް ހާޒިރު ކޮށްފައެވެ.
ނަތަންޔާހޫގެ ކެބިނެޓްގައި ތިބި ވަޒީރުން "ޣައްޒާގެ ނަސްލު ނައްތާލުމަށް" ގޮވާލާ ގޮވާލުންތަކަކީ ހައްދުފަހަނަޅާފައިވާ ކަމެއް ކަމާއި އެއީ ނުރައްކާތެރި ކަމެއްގެ ގޮތުގައި އޭނާވަނީ ސިފަކޮށްފައެވެ.
މެއި މަހުގެ 19 ވީ ހޯމަ ދުވަހު ފްރާންސްގެ ރައީސް އިމަނުއެލް މެކްރޮން އާއި ކެނެޑާގެ ބޮޑުވަޒީރު މާކް ކާނީއާ ގުޅިގެން ޣައްޒާގައި ހިނގަމުންދާ ހަނގުރާމަ ފުޅާވުމާއި ސަހްޔޫނީ ސަރުކާރުން ބަނޑުހައިހޫނުކަމުގެ ތެރެއަށް ދޫކޮށްލައިފައިވާ ފަލަސްތީނުގެ ރައްޔިތުންނަށް ތަހައްމަލު ނުކުރެވޭފަދަ އިންސާނީ ތަކުލީފުތައް ވަރުގަދައަށް ކުށްވެރި ކުރެއްވިއެވެ.
