އއ. މާޅޮހުގައި އަނިޔާވެރިކޮށް މަރާލާފައިވާ އަބްދުއްރަޙްމާން އާދަމް މަރާލި މައްސަލައިގައި ތިން މީހެއްގެ މައްޗަށް ގަސްތުގައި މީހަކު މަރާލުމުގެ ދައުވާ އިއްޔެ އުފުލައިފިއެވެ.

މި މައްސަލައިގައި ދައުވާ އުފުލާފައިވަނީ ހައްޔަރުކުރެވުނު ތިން މީހުންގެ މައްޗަށެވެ. އެ ތިން މީހުންނަކީ:

- އއ. މާޅޮސް، ފިޔަ، އަޙުމަދު އާޝިދު

- އއ. މާޅޮސް، ލިލީފެހި، މުޙައްމަދު ވިސާމް

- އއ. މާޅޮސް، ފިނިވާގެ، އަޙުމަދު ފާރިސް

މީގެ ތެރެއިން އަޙުމަދު އާޝިދުގެ މައްޗަށް އުފުލާފައިވަނީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން ގަސްތުގައި މީހަކު މެރުމުގެ ކުށުގެ ދައުވާ އެވެ. މުޙައްމަދު ވިސާމާއި އަޙުމަދު ފާރިސްގެ މައްޗަށް އުފުލާފައިވަނީ އެ ޤާނޫނުގެ ދަށުން ގަސްތުގައި މީހަކު މެރުމުގައި ބައިވެރިވުމުގެ ކުށުގެ ދައުވާ އެވެ.

އަބްދުއްރަޙްމާން މަރާލި މައްސަލައިގެ ތުހުމަތަށް މި ތިން މީހުން މިދިޔަ އޮގަސްޓް މަހު ހައްޔަރުކޮށް، ޝަރީޢަތް ނިމެންދެން ބަންދުގައި ބެހެއްޓުމަށް ވަނީ އަމުރުކޮށްފައެވެ.