ރާއްޖޭގެ އެއްވަނަ ކޮމެޑީ ޝޯ "ދިރިއުޅުމަކީ މިއީބާ" މާދަމާރޭ ދައްކަން ފަށާނެކަން ހާމަކޮށްފިއެވެ.

މި ފަހަރުގެ "ދިރިއުޅުމަކީ މިއީބާ" ޗެނަލް13 އިން ގެނެސްދިނުމަށް ހަމަޖެހިފައިވާއިރު އެ ސިލްސިލާގެ ފުރަތަމަ އެޕިސޯޑު ހުކުރު ދުވަހުގެރޭ 10:30 ގައި އޮން އެއަރ ކުރާނެ ކަމަށް އެ ޗެނަލްގެ ސްޓޭޝަން މެނޭޖަރު ހުސެއިން އިހުސާން ވަނީ މައުލޫމާތު ދެއްވާފައެވެ.

އިހުސާން ވިދާޅުވި ގޮތުގައި ރާއްޖޭގެ އެއް ނަމްބަރު ކޮމެޑޯ ޝޯ ދެއްކުމަށް ޗެނަލް13 ޚިޔާރު ކުރެއްވީތީ ޝޯގެ ޕްރޮޑިއުސަރ އަދި ކުލަދާނަ އެކްޓަރ ޔޫސުފު ރަފީއު (ޔޫސޭ)އަސް ޝުކުރު އަދާކުރާ ކަަމަށެވެ.

ދިރިއުޅުމަކީ މިއީބާ އަކީ އިޖްތިމާއީ ބޮޑެތި މައްސަލަތަކެއްގެ މައްޗަށް ބިނާކޮށް އުފައްދާ ޕްރޮގްރާމްތަކެކެވެ. ޔޫސޭގެ މިހިދުމަތަކީ ގައުމީ ހިދުމަތެއްގެ ގޮތުގައި ކޮށްދެއްވާކަމެއްކަމަށް އޭނާވަނީ ޗެނަލް13 އަށް މައުލޫމާތު ދެއްވާފަައެވެ. މި ހިދުމަތުގެ ތެރެއިން މުޖުތަމައުގައި އެއިރެއްގައި އިސްލާހު ކުރަންޖެހޭ ކަންތައްތަކަށް އެޑްރެސް ކުރެވިގެން ދާއިރު މިއި ދިވެހިންނަސް ލިބިގެންދާނެ ކުރިއެރުމެއް ކަމަށްވެސް ޔޫސޭ ވިދާޅުވިއެވެ.

ދިރިއުޅުމަކީ މިއީބާގެ 631 އެޕިސޯޑު މިހާތަނަށް ވަނީ އުފައްދައިފައެވެ. ޔޫސޭ ވިދާޅުވީ ކުރީ އަހަރު ތަކާ އަޅައިބަލާއިރު މިއަހަރު ދައްކާ އެޕިސޯޑުތައް ވަރަށް ބޮޑަށް ރަނގަޅުވާނެ ކަމަށެވެ.

46 އަހަރު މެދު ނުކެނޑި ގެނެސްދެމުން ގެންދާ ދިރިއުޅުމަކީ މިއީބާ އަކީ ސިޔާސީ އިޖުތިމާއީ އަދި ކޮމެޑީ ކުލަތަކާއެކު ދައްކާ އުފެއްދުމަކަށްވާއިރު މިއަހަރުވެސް މި ހުރިހާ ރަހައެއް އެކުލެވޭ، ބެލުންތެރިންނަށް ކަމުދާނެފަދަ އެޕިސޯޑުތަކެއް ދައްކާނެ ކަމަށް ޔޫސޭ ވިދާޅުވިއެވެ.