އިންޑިއާގެ ތަމަޅަ ފިލްމީ ސިނަމާގައި މަގްބޫލުކަން ހޯދާފައިވާ އެކްޓަރު ޖޭ، އިސްލާމްދީން ގަބޫލުކޮށްފައިވާކަން ރަސްމީކޮށް ކަށަވަރުކޮށްދީފިއެވެ. މީޑިއާތަކަށް ދިން އިންޓަވިއުއެއްގައި އޭނާ ވަނީ މި ނިންމުން ނިންމަން މެދުވެރިވި ސަބަބުތަކާއި އޭނާއަށް ކުރެވުނު އިހުސާސްތައް ހިއްސާކޮށްފައެވެ.
ޖޭ ބުނި ގޮތުގައި އޭނާގެ ކުރީގެ ދިރިއުޅުމުން ހިތުގެ ހަމަޖެހުމެއް ނުލިބުނު ނަމަވެސް، މިސްކިތުގެ ތެރެއިން އޭނާއަށް ހަގީގީ ހަމަޖެހުމާއި، ހަމަހަމަކަމާއި އަދި އިހުތިރާމް ލިބިފައިވެއެވެ. އޭނާގެ ވިސްނުން މުޅިން ބަދަލުވެގެންދިޔައީ މިސްކިތަކަށް ވަނުމަށްފަހު، އެއްވެސް ތަފާތުކުރުމެއް ނެތި އެންމެން އެއް ސަފެއްގައި އަޅުކަން ކުރަން ތިބޭ މަންޒަރު ފެނުމުން ކަމަށް އޭނާ ފާހަގަކުރިއެވެ.
އޭނާ އިތުރަށް ބުނީ، އޭނާއަކީ މަޝްހޫރު ސެލެބްރިޓީއަކަށް ވީތީ މިސްކިތުގެ ތެރެއިން އެއްވެސް މީހަކު އޭނާއަށް ވަކި ހާއްސަ ސަމާލުކަމެއް ދީފައެއް ނުވާ ކަމަށެވެ. އޭގެ ބަދަލުގައި އެންމެންނާ މެދުވެސް އަމަލުކުރީ ހަމަހަމަކަމާއެކުގައެވެ. މިއީ އަހަރެންގެ ހިތަށް ވަރަށް ފުން އަސަރުތަކެއް ކުރި ކަމެއް ކަމުގައި ޖޭ ބުންޏެވެ.
ދީން ބަދަލުކުރުމާ ގުޅިގެން އޭނާގެ ނަން "އަޒީޒް ޖޭ" ގެ ނަމަށް ބަދަލުކުރުމަށް ވިސްނަމުންދާ ކަމަށްވެސް އޭނާ ވަނީ ހާމަކޮށްފައެވެ. މިއީ އޭނާގެ ދިރިއުޅުމަށް އައި ވަރަށް ބޮޑު ބަދަލެއްގެ ގޮތުގައި އޭނާ ސިފަކުރެއެވެ.
އެކްޓަރު ޖޭ އަކީ 2002 ވަނަ އަހަރު ނެރުނު މަގްބޫލު ފިލްމު "ބަގަވަތީ" ގައި އިންޑިއާގެ ތަމަޅަނާޑޫގެ މިހާރުގެ ޗީފް މިނިސްޓަރު އަދި މަޝްހޫރު އެކްޓަރު ޖޯސެފް ވިޖޭ ކުޅުނު ކެރެކްޓާގެ ކޮއްކޮގެ ރޯލުން ބޮޑު މަޝްހޫރުކަމެއް ހޯދި ތަރިއެކެވެ. އޭގެ ފަހުން އޭނާ ވަނީ ތަމަޅަ ފިލްމީ ދާއިރާގައި ކާމިޔާބު ގިނަ ފިލްމުތަކެއް ކުޅެފައެވެ.
