މާލޭގެ ހުޅަނގު ފަރާތުގައި އޮންނަ ރަސްފަންނު ސަރަހައްދު މަރާމާތުކުރުމަށްޓަކައި އެ ތަނުގެ އެކި ސަރަހައްދުތައް ވަގުތީގޮތުން ބަންދުކުރުމަށް މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާ އިން ނިންމައިފިއެވެ.
އެ މިނިސްޓްރީން އިއްޔެ ކުރި އިއުލާނެއްގައި ބުނެފައިވަނީ، އިއްޔެއިން ފެށިގެން ރަސްފަންނު މަރާމާތުކުރުމުގެ އަމަލީ މަސައްކަތްތައް ފަށާފައިވާ ކަމަށެވެ. އަދި މި މަސައްކަތް ކުރިއަށްދާ މުއްދަތުގައި، މަރާމާތު ކުރަމުންދާ ވަކިވަކި ސަރަހައްދުތައް އާންމުންނަށް ނުވަދެވޭ ގޮތަށް ބަންދުކުރަމުން ގެންދާނެ ކަމަށްވެސް މިނިސްޓްރީން މައުލޫމާތު ދެއެވެ.
މާލޭ ސިޓީ ކައުންސިލްގެ ބެލުމުގެ ދަށުގައި އޮންނަ ރަސްފަންނު ސަރަހައްދުގައި ހުރި ވަސީލަތްތައް ބޭނުންނުކުރެވޭ ވަރަށް ވީރާނާވެފައިވާތީ، މީގެ ކުރިންވެސް އާންމުންގެ ފާޑުކިޔުންތައް އެ ސަރަހައްދަށް ވަނީ އަމާޒުވެފައެވެ.
ފާހަގަކޮށްލެވޭ ގޮތުގައި، ރަސްފަންނު ސަރަހައްދަކީ ކުރީގެ ރައީސް އަބްދުﷲ ޔާމީންގެ ޒައާމަތުގައި ތަރައްގީކުރެއްވި ތަނެކެވެ. މި ފެށުނު މަރާމާތުގެ މަސައްކަތަކީ އެ ސަރަހައްދުގެ ފެންވަރު އަލުން ރަނގަޅުކޮށް، އާންމުންނަށް ހިތްފަސޭހަ މައިޒާނެއްގެ ގޮތުގައި ބޭއްވުމަށް ކުރެވޭ މަސައްކަތެކެވެ.
