އިސްރާއީލުން ލުބުނާނުގެ ދެކުނުގެ އެކި ސަރަހައްދުތަކަށް ދެމުންދާ ވަރުގަދަ ހަމަލާތަކުގައި ވޭތުވެދިޔަ 24 ގަޑިއިރު ތެރޭގައި އެކަނިވެސް 41 މީހުން މަރުވެފައިވާ ކަމަށް ލުބުނާނުގެ ހެލްތު މިނިސްޓްރީން ހާމަކޮށްފިއެވެ.
މީގެ ދެ ހަފުތާ ކުރިން އިއުލާންކުރި "ސީޒްފަޔަރ" ނުވަތަ ހަމަލާ ބަދަލުކުރުން ހުއްޓާލުމުގެ އެއްބަސްވުމާ އިސްރާއީލުން ތަކުރާރުކޮށް ޚިލާފުވަމުންދާ އިރު، އިއްޔެ އެކަނިވެސް 10 މީހުން ވަނީ މަރުވެފައެވެ. މިދިޔަ މާރިޗު މަހުގެ 2 ވަނަ ދުވަހުން ފެށިގެން މިހާތަނަށް މި ހަނގުރާމައިގައި މަރުވި މީހުންގެ ޖުމްލަ އަދަދު މިހާރު ވަނީ 2,659 އަށް އަރާފައެވެ. އަދި 8,183 މީހުންނަށް އެކި ވަރުގެ އަނިޔާތައް ލިބިފައިވާ ކަމަށް ރަސްމީ ތަފާސްހިސާބުތަކުން ދައްކައެވެ.
ލުބުނާނުގެ ނޭޝަނަލް ނިއުސް އެޖެންސީން ރިޕޯޓުކޮށްފައިވާ ގޮތުގައި، ނަބަޓިއޭ ޑިސްޓްރިކްޓްގެ ޝޫކިންއަށް ދިން ހަމަލާއެއްގައި ތިން މީހަކު މަރުވެފައިވާ އިރު، ކަފަރު ދައްޖާލްގައި ދުއްވާފައި ދިޔަ ކާރަކަށް ދިން ހަމަލާއެއްގައި ދެ މީހަކު ވަނީ މަރުވެފައެވެ. މީގެ އިތުރުން ލްވައިޒާ އަވަށުގައި ހުރި ގެއަކަށް ދިން ހަމަލާއެއްގައި ތިން މީހަކު މަރުވެފައިވާ އިރު، ނަބަޓިއޭ ސިޓީގެ އަލްގުދުސް ބުރު ކައިރިއަށާއި ޓައިރް ޑިސްޓްރިކްޓްގެ ސިއްދީގީންއަށް ވެސް އިސްރާއީލުގެ ހަނގުރާމަމަތީ ބޯޓުތަކުން ވަނީ ބޮން އަޅާފައެވެ.
