ޕާކިސްތާނުގެ ވައިގެ ސިފަައިގެ ގާބިލުކަން އިތުރުކުރުމަށް ޗައިނާއިން އުފައްދާ އެންމެ ޒަމާނީ ޖޭ-35 (J-35) ސްޓެލްތު ފައިޓަރު ޖެޓްތަކުގެ ފުރަތަމަ ބެޗް 2026 ވަނަ އަހަރު އެގައުމަށް ލިބޭނެ ކަމަށް ރިޕޯޓުތައް ބުނެފިއެވެ. މިއީ ދެކުނު އޭޝިއާގެ ސަރަހައްދީ ސަލާމަތާއި ރައްކާތެރިކަމަށް އަންނާނެ ބޮޑު ބަދަލެއްގެ ގޮތުގައި އަސްކަރީ މާހިރުން ސިފަކުރެއެވެ.
މި މަޝްރޫއުގެ ދަށުން ކުރިއަށް އޮތް އަހަރުތަކުގައި ޕާކިސްތާނަށް މި މަތިންދާބޯޓުތައް ފޯރުކޮށްދިނުމަށް ހަމަޖެހިފައިވާއިރު، ފުރަތަމަ ޝިޕްމަންޓްގެ ގޮތުގައި 4 އާއި 12 އާ ދެމެދުގެ އަދަދަކަށް މަތިންދާބޯޓު މިއަހަރުގެ ފަހުކޮޅު ލިބުމުގެ ފުރުސަތު އޮތް ކަމަށް ވެސް މައުލޫމާތު ލިބެއެވެ. ޖޭ-35 އަކީ ރާޑަރުތަކަށް ފަސޭހައިން ނުފެންނަ ގޮތަށް ފަރުމާކޮށްފައިވާ ފަސްވަނަ ޖީލުގެ ފައިޓަރު ޖެޓެކެވެ.
ޗައިނާގެ ޝެންޔަންގް އެއަރކްރާފްޓް ކޯޕަރޭޝަނުން އުފައްދާ މި ޖެޓަކީ އެމެރިކާގެ އެފް-35 އާ ވާދަކުރާނެ ފަދަ ވަރުގަދަ އުޅަނދެއް ކަމަށް ބެލެވެއެވެ. ޕާކިސްތާނުން މި ޖެޓްތައް ހޯދުމަށް ނިންމާފައިވަނީ އަވަށްޓެރި އިންޑިއާއިން ހޯދަމުންދާ ޒަމާނީ އަސްކަރީ ވަސީލަތްތަކާ ފައިހަމަކުރުމުގެ ގޮތުންނެވެ.
މި މަތިންދާބޯޓުތައް ޕާކިސްތާނުގެ ވައިގެ ސިފައިންގެ ފްލީޓާ ގުޅުމުން، އެގައުމަކީ މި ސަރަހައްދުގައި ފަސްވަނަ ޖީލުގެ ސްޓެލްތު ޓެކްނޮލޮޖީ ބޭނުންކުރާ ފުރަތަމަ ގައުމުތަކުގެ ތެރޭގައި ހިމެނިގެންދާނެއެވެ. މީގެ އިތުރުން މިއީ ޗައިނާ އާއި ޕާކިސްތާނާ ދެމެދު އޮތް އަސްކަރީ ގުޅުން އިތުރަށް ވަރުގަދަވެގެންދާނެ ކަމެއްގެ ގޮތުގައި ވެސް ބެލެވެއެވެ.
