ބައިނަލްއަގްވާމީ ސައިންސްވެރިންގެ ޓީމަކުން ހަންޓާވައިރަސްއަށް ޚާއްސަ ވެކްސިނެއް އުފެއްދުމުގެ މަސައްކަތް ބާރުމިނުގައި ކުރަމުންދާ ކަމަށް ބީބީސީން ރިޕޯޓްކޮށްފިއެވެ. މި މަސައްކަތަކީ ދުނިޔޭގެ އެކި ކަންކޮޅުތަކުގައި މި ބަލި ފެތުރުން ހުއްޓުވުމަށް ކުރެވޭ މުހިންމު މަސައްކަތެކެވެ.
ހަންޓާވައިރަސް އަކީ އާންމުކޮށް މީދަލާއި އެފަދަ ޖަނަވާރުންގެ ޒަރީއާއިން އިންސާނުންގެ ގަޔަށް އަރާ ނުރައްކާތެރި ވައިރަހެކެވެ. މި ވައިރަސް އިންސާނުންގެ ހަށިގަނޑަށް ވަންނަނީ ވައިރަސް ހުންނަ ޖަނަވާރުގެ ކުޑަކަމުދާ ތަކެއްޗާއި، ބޮޑުކަމުދާ ތަކެތި ނުވަތަ ކުޅުގެ ޒަރީއާއިންނެވެ.
މި ބަލި ޖެހުމުން ފެންނަ އާންމު އަލާމާތްތަކުގެ ތެރޭގައި ހުން އައުން، ގައިގައި ރިއްސުން، ބޮލުގައި ރިއްސުން އަދި ވަރުބަލިވުން ހިމެނެއެވެ. ބަލި ބޮޑުވާ ހާލަތްތަކުގައި ނޭވާލާން އުނދަގޫވުމާއި ފުއްޕާމޭގެ މައްސަލަތައް ކުރިމަތިވެއެވެ. މިއީ މަރުގެ ނުރައްކާ އޮތް، ފަރުވާ ނުހޯދައިފިނަމަ ފުރާނައަށް ނުރައްކާވާ ފަދަ ބައްޔެކެވެ.
ދާދި ފަހުން ކްރޫޒް ޝިޕެއްގައި ތިބި ބައެއްގެ ގަޔަށް މި ވައިރަސް ޖެހިފައިވާ ކަމުގެ ރިޕޯޓްތަކެއް ވަނީ ލިބިފައެވެ. ޑަބްލިއުއެޗްއޯ އިން ބުނާ ގޮތުގައި އެމްވީ ހޮންޑިއަސް ކްރޫޒް ޝިޕް އާއި ހަންޓާވައިރަސްގެ 8 ކޭސް ގުޅިފައިވާއިރު، 3 މީހަކު މަރުވެ، 1 ފަސިންޖަރެއްގެ ހާލު ސީރިއަސްއެވެ. މި ހާދިސާއާ ގުޅިގެން ކަމާބެހޭ ފަރާތްތަކުން ދަނީ އެ އުޅަނދުގައި ތިބި މީހުންގެ ހާލަތު ވަރަށް ގާތުން ބަލަމުންނެވެ.
ސައިންސްވެރިން ބުނާ ގޮތުގައި މިހާރު އުފައްދަމުންދާ ވެކްސިނަކީ މިފަދަ ކުއްލި ހާލަތްތަކުގައި ބަލި ފެތުރުން ކޮންޓްރޯލް ކުރުމަށް ލިބޭނެ ބޮޑު އެހީއެކެވެ. ވެކްސިންގެ މަސައްކަތް ނިމި، އާންމުންނަށް ލިބެން ފެށުމުން މި ބަލީގެ ނުރައްކާ ބޮޑުތަނުން ކުޑަވެގެންދާނެ ކަމަށް އުންމީދު ކުރެވެއެވެ.
