ސަރުކާރު އެއްކޮށް އަޑިއަށް ދަނީ ކަމަށާއި އެންމެ ފަހުގެ ވިސްނޭ މީހާވެސް ސަރުކާރުން ވަކިވެއްޖެ ކަމަށް ޕީޕަލްސް ނޭޝަނަލް ފްރަންޓް (ޕީއެންއެފް) ގެ ނައިބު ރައީސް ޑރ. މުޙައްމަދު ޖަމީލް އަޙްމަދު ސަރުކާރަށް ފާޑުވިދާޅުވެއްޖެއެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ޑރ. ޖަމީލް ވަނީ، މޫސާ ޒަމީރު އިސްތިއުފާ ދެއްވުމަށް އިޝާރާތް ކުރައްވައި، ރައީސް މުޢިއްޒުގެ ސަރުކާރުން "އެންމެ ފަހުގެ ޙިކުމަތްތެރިޔާ" ވެސް ނެތިގެން ގޮސްފި ކަމަށް ވިދާޅުވެފައެވެ.
ޑރ. ޖަމީލް ތުހުމަތު ކުރެއްވި ގޮތުގައި، ރައީސް މުޢިއްޒާއި މޫސާ ޒަމީރާ ދެމެދު މައްސަލަ ޖެހެން މެދުވެރިވީ ކުރިއަށް އޮތް އެއްބަސްވުންތަކުގެ ހިއްސާ ބަހާނެ ގޮތަކާ މެދު އުފެދުނު ޚިޔާލުތަފާތުވުންތަކެއްގެ ސަބަބުންނެވެ. ސަރުކާރުގެ ހިންގުންތެރިކަމަށް އިޝާރާތް ކުރައްވައި ޖަމީލް ވިދާޅުވީ، ސަރުކާރުގެ "ބޯޓު" ކަނޑައެޅިގެން އަޑިއަށް ދަމުންދާ ކަމަށާއި، މިހާރު އުފެދޭ ސުވާލަކީ މި ސަރުކާރު ދެން އޮންނާނީ ކިހާ ދުވަހެއް ވަންދެންތޯ ކަމަށެވެ.
މީގެ އިތުރުން، ނައިބު ރައީސް ސެމްބެ އާއި ރައްޔިތުންގެ މަޖިލީހުގެ ރައީސް އަދުރޭގެ މަގާމުތައް ވެސް އޮތީ ވަރަށް ނާޒުކު ފަށެއްގައި ކަމަށް ޑރ. ޖަމީލް ފާހަގަކުރެއްވިއެވެ.
