ފީފާ ވޯލްޑް ކަޕްގައި ޖަޕާނާއި ނެދަލެންޑްސް ބައްދަލުކުރި މެޗު 2-2 އިން އެއްވަރުވެގެން ނިމުނު ނަމަވެސް، މުޅި ދުނިޔޭގެ ސަމާލުކަން ހުއްޓުނީ މެޗަށްފަހު ޖަޕާނުގެ ސަޕޯޓަރުން ދެއްކި ނަމޫނާ އަށެވެ.
މެޗު ނިމުމާއެކު ދަނޑުން އެތައް ހާސް ބަޔަކު ނުކުމެގެން ދިޔައިރު، ޖަޕާނުގެ ސަތޭކައެއްހާ ސަޕޯޓަރުން ވަނީ މަޑުކޮށް، ދަނޑުގެ ސްޓޭންޑްތަކުގައި ހުރި ކުނިތައް ސާފުކޮށްފައެވެ. އެމީހުން ގެނައި ކަޅުކުލައިގެ ކުނި ކޮތަޅުތަކަށް ކުނި އަޅައި، މުޅި ސަރަހައްދު ސާފުކުރާ މަންޒަރު ފެންނަ ވީޑިއޯތަކާއި ފޮޓޯތައް މިހާރު ވަނީ ސޯޝަލް މީޑިއާގައި ވައިރަލްވެ، ގިނަ ބައެއްގެ ތައުރީފު ލިބިފައެވެ.
ޖަޕާނުގެ ސަޕޯޓަރުންގެ މި އަމަލަކީ ހަމައެކަނި ސަމާލުކަން ހޯދުމަށް ކުރާ ކަމެއް ނޫނެވެ. މިއީ އެ ގައުމުގެ ސަގާފަތުގައި ބިންވަޅު ނެގިފައިވާ އިހުތިރާމާއި، ޒިންމާދާރުކަން އަދި އެހެން މީހުންނަށް އަޅާލުމުގެ ރީތި ސިފައެކެވެ. ޖަޕާނުގެ ތައުލީމީ ނިޒާމުގެ ތެރެއިން ކުޑައިރުއްސުރެ ކުދިންނަށް ދަސްކޮށްދޭ މި އަގުހުރި ސިފަ، ކޮންމެ ބައިނަލްއަގްވާމީ މުބާރާތެއްގައިވެސް އެ ގައުމުގެ ސަޕޯޓަރުން ދަނީ ދައްކަމުންނެވެ.
ޖަޕާނުގެ ގައުމީ ޓީމު މޮޅުވިޔަސް ނުވަތަ ބަލިވިޔަސް، ދަނޑު ސާފުނުކޮށް އެމީހުން ދަނޑަކުން ނުދެއެވެ. ހަމައެކަނި ސަޕޯޓަރުންނެއް ނޫނެވެ. ޖަޕާނުގެ ގައުމީ ޓީމުގެ ކުޅުންތެރިންވެސް މެޗުތަކަށްފަހު ޗޭންޖިންގ ރޫމްތައް ނުހަނު ސާފުކޮށް ބޭއްވުމަށްފަހު، މުބާރާތް ބާއްވާ ގައުމަށް ޝުކުރު އަދާކޮށް ނޯޓެއް ބޭއްވުމަކީ އެމީހުންގެ އާދައެކެވެ.
ކުޅިވަރުގެ ދަނޑުތަކުން ވާދަވެރިކަމާއި ހަމަނުޖެހުންތަކުގެ ޚަބަރުތައް އާންމުކޮށް އިވޭއިރު، ޖަޕާނު ސަޕޯޓަރުންގެ މި އަމަލަކީ މުޅި ދުނިޔެއަށް ނަމޫނާ އެކެވެ. މިއީ ހަގީގީ ކުޅިވަރުގެ ރޫހަކީ ހަމައެކަނި ދަނޑުމަތީގައި ދައްކާ ހުނަރު ނޫންކަމާއި، އެއީ މީހުންނާއި ތަންތަނަށް ކުރާ އިހުތިރާމްކަން ހަނދާންކޮށްދޭ ކަމެކެވެ.
