އެމެރިކާއާއެކު ވެވޭ ނިއުކްލިއާ އެއްބަސްވުންތަކުގައި، ރަޝިޔާއާއި ޗައިނާ ހެކިވެރިންގެ ގޮތުގައި ބައިވެރިވުމަށް އީރާނުން ގޮވާލައިފިއެވެ. އީރާނުން މިކަމަށް ގޮވާލާފައިވަނީ އެމެރިކާއިން އެއްބަސްވުންތަކާ ޚިލާފުވުން ހުއްޓުވައި، ބައިނަލްއަޤުވާމީ އިތުބާރު ކަށަވަރުކުރުމުގެ މަޤްޞަދުގައެވެ.
އީރާނުގެ ސަރުކާރުން ހާމަކުރި ގޮތުގައި، މިހާރު ރަޝިޔާއާއި ޗައިނާއަކީ އީރާނުގެ މުހިންމު ބައިވެރިންނަށްވާއިރު، އެ ދެ ޤައުމުން ހެކިވެރިންގެ ގޮތުގައި ތިބުމަކީ އެމެރިކާއަށް އެއްބަސްވުމާ ޚިލާފުވުމަށް އޮތް ބޮޑު ހުރަހަކަށް ވާނެއެވެ. އަދި މީގެ ސަބަބުން ސަރަޙައްދީ ހަމަޖެހުމާއި، ހަނގުރާމަ ހުއްޓާލުމުގެ އެއްބަސްވުންތަކަށް އޮތް ނުރައްކާ ކުޑަވެގެންދާނެ ކަމަށްވެސް އީރާނުން ބުނެއެވެ.
މި ނިންމުމަކީ މީގެ ކުރިން 2015 ވަނަ އަހަރު ވެވުނު ނިއުކްލިއާ އެއްބަސްވުމުން އެމެރިކާ ވަކިވުމާ ގުޅިގެން އުފެދުނު ނުތަނަވަސްކަމަށް ޙައްލެއް ހޯދުމަށް ކުރެވޭ މަސައްކަތެކެވެ. އީރާނުން ޤަބޫލުކުރާ ގޮތުގައި ދުނިޔޭގެ ބާރުގަދަ ދެ ޤައުމު ކަމަށްވާ ރަޝިޔާއާއި ޗައިނާގެ ބައިވެރިވުމާއެކު، އެމެރިކާއަށް ދެން މިފަދަ އެއްބަސްވުންތަކާ ޚިލާފުވުމުގެ ފުރުޞަތެއް ނޯންނާނެއެވެ.
މިކަމާ ގުޅޭގޮތުން އެ ދެ ޤައުމުން އަބަދުވެސް އަންނަނީ އީރާނުގެ ނިއުކްލިއާ މައްސަލައަށް ސުލްހަވެރި ޙައްލެއް ހޯދުމަށް ބާރުއަޅަމުންނެވެ.
