ފުޓްބޯޅައިގެ ތާރީޚުން ފަނޑުވުމެއް ނެތް އުޖާލާ ބާބެއް ނިމިގެންދިޔަ ކަހަލަ އިހުސާސަކާއެކު، ކްރޮއޭޝިއާގެ ފުޓްބޯޅަ ލެޖެންޑް ލޫކާ މޮޑްރިޗްގެ ވޯލްޑް ކަޕް ދަތުރު ހިތްދަތި ގޮތަކަށް ނިމިއްޖެއެވެ.
2026 ވަނަ އަހަރުގެ ފީފާ ވޯލްޑް ކަޕްގެ ރައުންޑް އޮފް 32 ގައި ޕޯޗުގަލް އަތުން 2-1 އިން ބަލިވެ، ކްރޮއޭޝިއާ މުބާރާތުން ކެޓީ ރޭގައެވެ. މި މެޗުގައި ކްރޮއޭޝިއާގެ އިވާން ޕެރިސިޗް ލަނޑެއް ޖަހައި އުއްމީދު އާކޮށްދިން ނަމަވެސް، ޕޯޗުގަލްގެ ކްރިސްޓިއާނޯ ރޮނާލްޑޯ އާއި ގޮންސާލޯ ރާމޯސް ޖެހި ލަނޑުތަކާއެކު ކްރޮއޭޝިއާގެ ދަތުރު ނިމުމަކަށް އައީއެވެ. މެޗުގެ ފަހު ވަގުތު ކްރޮއޭޝިއާ އިން ޖެހި ލަނޑެއް ވީއޭއާރު އިން ބާތިލްކުރުމާއެކު، މޮޑްރިޗްގެ "ލާސްޓް ޑާންސް" ނިމުނީ ހިތްދަތިކަމާއެކުގައެވެ.
އުމުރުން 40 އަހަރުގެ މޮޑްރިޗަކީ ހަނގުރާމައިގެ ނުރައްކަލުގެ ތެރޭގައި ބޮޑުވި، ދަތި އުނދަގޫ ދިރިއުޅުމަކުން އައިސް ދުނިޔޭގެ އެންމެ މަތީ ޝަރަފުތައް ހާސިލްކުރި ކުޅުންތެރިއެކެވެ. ކުޑައިރު އޭނާގެ ހަށިގަނޑު ކުޑަވުމުން ކޯޗުން އޭނާއަށް ފުރުސަތު ނުދިން ނަމަވެސް، އޭނާ ވަނީ ޓޮޓެންހަމް އާއި ރެއާލް މެޑްރިޑްގައި ދުނިޔެ ހައިރާންކޮށްލާފައެވެ. ރެއާލް މެޑްރިޑާއެކު ޗެމްޕިއަންސް ލީގުގެ 6 ތަށި ހޯދުމުގެ އިތުރުން، 2018 ވަނަ އަހަރު ކްރޮއޭޝިއާ ވޯލްޑް ކަޕްގެ ފައިނަލަށް ގެންގޮސްދީ، އެ އަހަރުގެ ބެލޮންޑިއޯ އެވޯޑް ހާސިލްކޮށްފައިވެއެވެ.
ކްރޮއޭޝިއާގެ ގައުމީ ޓީމަށް އެންމެ ގިނަ މެޗު ކުޅެދީފައިވާ މޮޑްރިޗްގެ ވަދާއީ ވަގުތުކޮޅު ފެނިގެންދިޔައީ ވަރަށް އާދައިގެ ގޮތަކަށެވެ. އޭނާ ވަނީ ދަނޑު ވަށައި ހިނގަމުން ސަޕޯޓަރުންނަށް އަތްތިލަބަޑި ޖަހައި އިހުތިރާމް އަދާކޮށްފައެވެ.
މޮޑްރިޗަށް ވޯލްޑް ކަޕް ތަށި އުފުލާލުމުގެ ނަސީބު ނުލިބުނު ނަމަވެސް، އޭނާ ވަނީ ދުނިޔޭގެ މިލިއަން އެތައް ސަޕޯޓަރުންގެ ހިތްތައް ކާމިޔާބުކޮށްފައެވެ. ކްރޮއޭޝިއާގެ ޖާޒީގައި ކުރިއަށް އޮތް ތަނުގައި އާ ކެޕްޓަނުން ފެނުނު ކަމުގައިވިޔަސް، ދެވަނަ ލޫކާ މޮޑްރިޗެއް ފެނުމަކީ ނާދިރު ކަމެކެވެ.
