އެމެރިކާއިން ހޯމަ ދުވަހު ބުނީ ޣައްޒާގައި އިސްރާއީލާއި ފަލަސްތީނުގެ ހަމާސްއާ ދެމެދު ހިނގަމުންދާ ހަނގުރާމަ ނިމުމަކަށް ގެނައުމަށް ރައީސް ޖޯ ބައިޑަން ހުށަހެޅުއްވި ހުށަހެޅުމަށް ތާއީދުކުރާ ގަރާރެއް އދ. ގެ ސަލާމަތީ މަޖިލީހުން ރުހުން ދޭން ބޭނުންވާ ކަމަށެވެ.

ގަރާރެއް ފާސްވުމަށް މަދުވެގެން ނުވަ ވޯޓު ބޭނުންވާއިރު އެމެރިކާ، ފްރާންސް، އިނގިރޭސިވިލާތް، ޗައިނާ ނުވަތަ ރަޝިޔާގެ ވީޓޯއެއް އޮވެގެން ނުވާނެއެވެ.

ޑްރާފްޓްގައި ހަމާސް އަށް ގޮވާލާފައި ވަނީ އެ އެއްބަސްވުން ގަބޫލުކޮށް ލަސްނުކޮށް އަދި ޝަރުތެއް ނެތި އެ އެއްބަސްވުމުގެ ޝަރުތުތައް ފުރިހަމައަށް ތަންފީޒު ކުރުމަށެވެ. އަދި ހަނގުރާމަ ދާއިމީ ގޮތެއްގައި ހުއްޓާލުމުގެ މަގުސަދުގައި، ކުރިން އެއްބަސްވެފައިވާ އެއްބަސްވުމުގެ ޝަރުތުތަކަށް ޕާޓީތަކުން ބޯލެނބުމުގެ މުހިންމުކަމުގެ މައްޗަށް ވެސް އެ ބަޔާނުގައި ވަނީ އަލިއަޅުވާލާފައެވެ.

އެމެރިކާއިން މި ގޮތަށް ހުށަހަޅާފައި މިވަނީ ޣައްޒާގެ ހަނގުރާމަ ހުއްޓާލުމަށާއި ހަމާސް ޖަމާއަތުން ހިފަހައްޓާފައިވާ އެންމެން ދޫކޮށްލުމަށާއި ރަފާހުގައި އިޒްރޭލުން ދެމުން ގެންދާ އަސްކަރީ ހަމަލާތައް ވަގުތުން ހުއްޓާލުމަށް އިޒްރޭލަށް އެންގުމަށް ގޮވާލައި ސަލާމަތީ މަޖިލީހުގެ ގަރާރުގެ ޑްރާފްޓެއް އަލްޖީރިއާއިން ހުށަހަޅާފައި ވަނިކޮށެވެ.

ބައިޑަން ހުކުރު ދުވަހު ވަނީ އިސްރާއީލުގެ ރަހީނުން ދޫކޮށްލުމުގެ ބަދަލުގައި ޣައްޒާގައި ހަނގުރާމަ ހުއްޓާލުމަށް އިސްރާއީލުން ހުށަހެޅި ތިން މަރުހަލާއެއްގެ ހުށަހެޅުމެއް އިއުލާންކޮށް "މިއީ ހަނގުރާމަ ނިމުމަކަށް އަންނަންވީ ވަގުތު" ކަމަށް ވިދާޅުވެފައެވެ.

މި ސަރަހައްދުގެ އިތުރުން ގިނަ ލީޑަރުންނާއި ސަރުކާރުތަކުން ވެސް މި ޕްލޭނަށް ތާއީދުކޮށްފައިވާ އިރު، މި އެއްބަސްވުން ތަންފީޒު ކުރުމަށް ގޮވާލުމުގައި ސަލާމަތީ މަޖިލީހުން ބައިވެރިވުމަށް ގޮވާލަން،" އދ އަށް ކަނޑައަޅާފައި ހުންނަވާ އެމެރިކާ ސަފީރު ލިންޑާ ތޯމަސް-ގްރީންފީލްޑް ނެރުއްވި ބަޔާނެއްގައި ވިދާޅުވިއެވެ.

އަދި އޭނާ ވަނީ އެ ގަރާރު ފާސްކުރުމަށް ކައުންސިލް މެމްބަރުންނަށް އިލްތިމާސް ކުރައްވާފައެވެ.  "މި ޑީލަށް ތާއީދުކޮށް އެއް އަޑަކުން ވާހަކަ ދައްކަން ޖެހޭ،" އޭނާ ވިދާޅުވިއެވެ.

ގްރޫޕް އޮފް ސެވަން (ޖީ7) ގެ ބޮޑެތި ޑިމޮކްރަސީތަކުގެ ލީޑަރުން ނެރުނު ބަޔާނެއްގައި ބުނެފައި ވަނީ ހަނގުރާމަ ހުއްޓާލުމާއި ރަހީނުން ދޫކޮށްލުމުގެ ފުރިހަމަ" އެއްބަސްވުމަށް "ފުރިހަމައަށް ތާއީދުކޮށް އަދި ފަހަތުގައި ތިބޭނެ" ކަމަށެވެ.  ސައުދީ އަރަބިއްޔާ، އުރުދުން، ޔުނައިޓެޑް އަރަބް އެމިރޭޓްސް، ގަތަރު އަދި މިސްރުގެ ޚާރިޖީ ވަޒީރުން ވިދާޅުވީ "ސީރިއަސްކޮށް ޕޮޒިޓިވްކޮށް މުއާމަލާތް ކުރުން" މުހިންމު ކަމަށެވެ.