ވެރިކަންކުރާ އެފްރިކަން ނޭޝަނަލް ކޮންގްރެސް (އޭއެންސީ) އާއި އިދިކޮޅު ޕާޓީތަކާ ދެމެދު ވެވުނު މުހިންމު ކޯލިޝަން އެއްބަސްވުމަކަށް ފަހު ދެކުނު އެފްރިކާގެ ޕާލަމެންޓުން އެގައުމުގެ ރައީސް ކަމަށް ސިރިލް ރަމަފޯސާ އަލުން އިންތިހާބުކޮށްފިއެވެ.
ގައުމީ އެއްބައިވަންތަކަމުގެ އާ ސަރުކާރަކީ ރަމަފޯސާގެ އޭއެންސީ އާއި ސެންޓަރ ރައިޓް ޑިމޮކްރެޓިކް އެލަޔަންސް (ޑީއޭ) އަދި ކުދި ޕާޓީތައް އެއްކޮށްލާފައިވާ ސަރުކާރެކެވެ.
ކާމިޔާބީގެ ތަގުރީރުގައި ރަމަފޯސާ ވަނީ އާ ކޯލިޝަނަށް ތައުރީފު ކުރައްވައި، ވޯޓުލާ މީހުން އުންމީދު ކުރަނީ ލީޑަރުން "އަޅުގަނޑުމެންގެ ގައުމުގެ އެންމެންގެ ލާބަޔާއި މަންފާއަށްޓަކައި ގުޅިގެން މަސައްކަތް ކުރާނެ" ކަމަށް ވިދާޅުވެފަ އެވެ.
އޭއެންސީއަށް %40 ވޯޓު ލިބުނުއިރު، ދެވަނައަށް ދިޔައީ %22 ވޯޓާއެކު ޑީއޭ އަށެވެ.
އޭއެންސީގެ ސެކްރެޓަރީ ޖެނެރަލް ފިކިލޭ އެމްބަލޫލާ ވަނީ ކޯލިޝަންގެ އެއްބަސްވުމަކީ "ފާހަގަކޮށްލެވޭ ފިޔަވަޅެއް" ކަމަށް ވިދާޅުވެފަ އެވެ.
