ކެނެޑާއިން އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) ޓެރަރިސްޓް ޖަމާއަތެއްގެ ގޮތުގައި ލިސްޓްކޮށްފައި ވަނީ އިދިކޮޅު ގާނޫނު ހަދާ މަޖިލީހުގެ މެންބަރުންނާއި އީރާނުގެ އިދިކޮޅުފަރާތްތަކުން އެކަމަށް ޕްރެޝަރު ކުރާތާ އަހަރުތަކެއް ފަހުންނެވެ.

ބުދަ ދުވަހު އެ ނިންމުން އިއުލާން ކުރައްވަމުން ޕަބްލިކް ސޭފްޓީ މިނިސްޓަރު ޑޮމިނިކް ލެބްލާންކް ވަނީ މިއީ "ޓެރަރިޒަމާ ދެކޮޅަށް މަސައްކަތް ކުރުމަށް މުހިންމު ނިންމުމެއް" ކަމަށް ވިދާޅުވެފައެވެ.

ކެނެޑާއާއި ހުޅަނގުގެ ގައުމުތަކުން އެފަރާތްތައް ނުރުހޭ ދައުލަތްތަކާއި ޖަމާއަތްތައް ޓެރަރިސްޓުންގެ ލަގަބު ދިނުމަކީ އާންމު ކަމެކެވެ.

މި ފިޔަވަޅުގެ ސަބަބުން އައިއާރުޖީސީގެ އިސް އޮފިޝަލުން ހިމެނޭ ގޮތަށް އީރާނުގެ ސަރުކާރުގެ އިސް އެތައް ހާސް އޮފިޝަލުންނަށް ކެނެޑާއަށް އެތެރެވުން މަނާކުރާނެއެވެ.

އީރާނުގެ ފަރްސް ނޫސް އެޖެންސީއާ ހަވާލާދީ އީރާނުގެ ފޮރިން މިނިސްޓްރީގެ ތަރުޖަމާނު މި ކަން ސިފަކުރެއްވި "ބުއްދިވެރި ނޫން އަދި އާދަޔާ ހިލާފު" ނިންމުމެއް ގޮތުގައެވެ. އަދި އޭނާ ވަނީ މިފިޔަވަޅު ކުށްވެރިކުރައްވާފައެވެ.

އައިއާރުޖީސީ އަކީ އީރާނުގެ އަސްކަރީ، ސިޔާސީ އަދި އިގްތިސާދީ ބޮޑު ބާރެކެވެ. އެއީ ރޫހާނީ ލީޑަރު އާޔަތުالله އަލީ ޚާމަނާއީ އާއި ގާތް ގުޅުމެއް އޮންނަ ޖަމާއަތެކެވެ.

އީރާނުގެ ސްޓްރެޓެޖިކް ހަތިޔާރުތައް ބަލަހައްޓާ އަމިއްލަ އަސްކަރިއްޔާއާ ނޭވީ އަދި ވައިގެ ސިފައިންނާއެކު 190،000 އަށް ވުރެ ގިނަ އެކްޓިވް ޕާސަނަލް މި ޖަމާއަތުގައި ތިބި ކަމަށް ލަފާކުރެވެއެވެ.

އައިއާރްޖީސީން މެދުއިރުމަތީގެ އެހެން ހިސާބުތަކުގައި ނުފޫޒު ފޯރުވަނީ އެ ޖަމާއަތުގެ ސިއްރު ބޭރުގެ އޮޕަރޭޝަން ހިންގާ ގުދުސް ފޯސް މެދުވެރިކޮށް ގުޅިފައިވާ ސަރުކާރުތަކަށާއި ހަތިޔާރު އެޅި ޖަމާއަތްތަކަށް ފައިސާއާއި ހަތިޔާރާއި ޓެކްނޮލޮޖީ އާއި ތަމްރީނާއި އިރުޝާދު ދީގެން ކަމަށް ކެނެޑާ ސަރުކާރުން ބުނެއެވެ.

މީގެ ކުރިން ވެސް ކެނެޑާއިން ޤުދުސް ފޯސް ޓެރަރިސްޓް ޖަމާއަތެއްގެ ގޮތުގައި ލިސްޓް ކުރި ނަމަވެސް ބުދަ ދުވަހުގެ އިއުލާނުގައި މުޅި އައިއާރުޖީސީއާއެކު ޤުދުސް ފޯސް ވެސް ލިސްޓްކޮށްފައިވެއެވެ.

ނޫސްވެރިންނާ ވާހަކަ ދައްކަވަމުން ލެބްލާންކް ވިދާޅުވީ މި އަމަލަކީ "އައިއާރުޖީސީގެ ޓެރަރިސްޓް ޖަމާއަތާ ދެކޮޅަށް ކެނެޑާގެ އަތުގައި ހުރި ހުރިހާ ވަސީލަތްތަކެއް ބޭނުންކުރާނެ ކަމުގެ ވަރުގަދަ މެސެޖެއް" ކަމަށެވެ.

މި ނިންމުމަށްފަހު ފަހު މިހާރުވެސް ކެނެޑާގައި ތިއްބެވި އީރާނު ސަރުކާރުގެ މިހާރުގެ އަދި ކުރީގެ އިސް ވެރިންވެސް މިހާރު ތަހުގީގުކޮށް މަގާމުން ދުރުކުރެވިދާނެއެވެ.

ކެނެޑާގެ ފޮރިން އެފެއާޒް މިނިސްޓަރު މެލާނީ ޖޯލީ ވަނީ އެ އިއުލާނާ ގުޅިގެން އީރާނުގައި ތިބި ކެނެޑާ މީހުން އީރާނުން ބަންދުކުރުމުގެ ނުރައްކާ ކުރިމަތިވެދާނެ ކަމުގެ އިންޒާރު ދެއްވާފައެވެ.

"އަހަރެންގެ މެސެޖު ސާފު: މިވަގުތު އީރާނުގައި ތިބި މީހުންނަށް މިއީ އެނބުރި ގައުމަށް އަންނަންވީ ވަގުތު،" އޭނާ ވިދާޅުވިއެވެ.

ޖަވާބުގައި އީރާނުގެ ފޮރިން މިނިސްޓްރީގެ ތަރުޖަމާނު ނާސިރު ކަނާނީއާ ވިދާޅުވީ ކެނެޑާގެ މި ފިޔަވަޅަކީ "ސިޔާސީ ގޮތުން ކުރިއަށް ގެންދިޔަ ބުއްދިވެރި ނޫން އަދި އާދަޔާ ހިލާފު ފިޔަވަޅެއް" ކަމަށެވެ.

ބޮޑުވަޒީރު ޖަސްޓިން ޓްރޫޑޯގެ ލީޑަރޝިޕްގައި ކެނެޑާ ސަރުކާރުން މީގެ ކުރިން ވަނީ ޓެރަރިސްޓުންގެ ގޮތުގައި އައިއާރުޖީސީ އިތުރުކުރުމަށް ދެކޮޅު ހަދާފައެވެ. ނަމަވެސް އީރާނުގެ ސަރުކާރާ ދެކޮޅު ބައެއް މެމްބަރުންގެ ޕްރެޝަރު ވަނީ ކުރިމަތިވެފައެވެ. އޭގެ ތެރޭގައި 2020 ވަނަ އަހަރުގެ ޖެނުއަރީ މަހު ފްލައިޓް ޕީއެސް752 އައިއާރުޖީސީން ވައްޓާލުމުން މަރުވި މީހުންގެ އާއިލާތައް ހިމެނެއެވެ.

އެ ފްލައިޓުގައި ތިބި 175 ފަސިންޖަރުން ވެސް މަރުވެފައިވާއިރު އޭގެ ތެރޭގައި ކެނެޑާގެ 55 ރައްޔިތުންނާއި ކެނެޑާގެ ދާއިމީ ރެޒިޑެންޓް 30 މީހުން ހިމެނެއެވެ.

ބޯޓަށް މިސައިލް ހަމަލާ ދިނީ އޮޅިގެން ކަމަށް ތެހެރާނުން ވަނީ ބުނެފައެވެ.