އިސްރާއީލުގެ ސިފައިންގެ އެންމެ އިސް ތަރުޖަމާނު ޑޭނިއެލް ހަގާރީ ބުދަ ދުވަހު ވަނީ ހަމާސް ނައްތާލެވެން ނެތް ކަމަށް ބުނެފައެވެ.

ތަރުޖަމާނުގެ ވާހަކަ ތަކާ ގުޅިގެން ލަސްތަކެއް ނުވެ އިސްރާއީލުގެ ސަރުކާރުން ވަނީ ހަމާސް ނައްތާލުމަށް ވި ވައުދު ފުއްދުމުގައި ދެމިއޮތްކަން ތަކުރާރުކޮށްފައެވެ.

އޮކްޓޯބަރު ހަތް ވަނަ ދުވަހު އިސްރާއީލަށް ހަމާސްއިން ދިން މީގެ ކުރިން ނުފެންނަ ވަރުގަދަ ތޫފާން އަގްސާ އޮޕަރޭޝަންގެ ހަމަލާގެ ސަބަބުން އަށް މަހަށް ވުރެ ގިނަ ދުވަސް ކުރިޔަށްދާ ހަނގުރާމައިން ހަމާސްގެ ހަނގުރާމަވެރިން ޣައްޒާއިން ނައްތާލުން ނާކާމިޔާބުވި ނަމަވެސް ފުޅާ ދާއިރާއެއްގައި ޣައްޒާއަށް ވަނީ ގެއްލުން ދީފައެވެ.

"ހަމާސް ނައްތާލާނެ ކަމަށް ބުނުމަކީ މީހުންގެ ލޮލަށް ވެލި އުކުން. އިތުރު ގޮތެއް ނުހޯދައިފިނަމަ ހަމާސް ދެމިއޮންނާނެ" އިސްރާއީލުގެ ޗެނަލް 13 ބްރޯޑްކާސްޓަރަށް ދިން އިންޓަވިއުއެއްގައި ރިއާ އެޑްމިރަލް ޑޭނިއަލް ހަގާރީ ބުންޏެވެ.

"ހަމާސް އަކީ ފިކުރެއް، އަޅުގަނޑުމެންނަކަށް ފިކުރެއް ނައްތާލެވޭކަށްނެތް."

އޭނާގެ މި ވާހަކަތަކަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ދޮގުކުރަން އަވަސްވެގަތްއިރު، ހަމާސް ބަލިނުވާހާ ހިނދަކު ޣައްޒާ ހަނގުރާމަ ނުނިމޭނެ ކަމަށް ކެބިނެޓުން ވަނީ ބުނެފައެވެ.

"ބޮޑުވަޒީރު ނަތަންޔާހޫ އިސްކޮށް ހުރި ސިޔާސީ އަދި ސަލާމަތީ ކެބިނެޓުން ހާސިލް ކުރަން ބޭނުންވާ ހަނގުރާމައިގެ އެއް އަމާޒަކީ ހަމާސްގެ އަސްކަރީ އަދި ސަރުކާރު ހިންގުމުގެ ގާބިލްކަން ނައްތާލުން،" އޭނާގެ އޮފީހުން ނެރުނު ބަޔާނެއްގައި ބުންޏެވެ.

އިސްރާއީލުގެ އަސްކަރިއްޔާއިން ޓެލެގްރާމް ޗެނަލްގައި ވަކިން ނެރުނު ބަޔާނެއްގައި ބުނެފައި ވަނީ ހަގާރީ ހަމާސް ސިފަކުރީ ފިކުރެއްގެ ގޮތުގައި ކަމަށާއި އޭނާ ދެއްކި ވާހަކަ ސާފު ސީދާ ކަމަށެވެ. އަދި އެ ވާހަކަ ތަކުން އެހެން މާނައެއް ނެގުމަކީ އޭގެ ސިޔާގުގެ ބޭރުން މާނަ ނެގުން ކަމަށެވެ.

އިސްރާއީލުން ހިފާފައިވާ ފަލަސްތީނުގެ ބިންތަކާއި މަސްޖިދުލް އަގްސާ ސަލާމަތްކުރުމަށް ހަމާސް އިން 2023 ވަނަ އަހަރު ފެށި ތޫފާން އަގްސާ އޮޕަރޭޝަނާ ގުޅިގެން ހިނގަމުންދާ ހަނގުރާމައަށް އެތައް މަހެއް ވެފައިވާއިރު، ބަރު ހަތިޔާރާއި، ޒަމާނީ ވަސީލަތްތަކާ، ޓެކްނޮލޮޖީއާ، ހުސްނުވާ ފައިސާއާއި ހުޅަނގާއި އެމެރިކާގެ ފުރިހަމަ ތާއީދާ އެކު ހަނގުރާމަ ކުރަމުންދާ އިސްރާއީލަށް ވަނީ ހަތިޔާރާއި ވަސީލަތްތައް މަދު ހަމާސް އަދި މުޖާހިދުން ބަލި ކުރަން ނުކުޅެދިފައެވެ.

ހަމާސް ނައްތާލުމަށް އަމާޒުކޮށްގެން އިސްރާއީލުން ހިންގާ ޖަރީމާތަކުގައި ޣައްޒާގައި މަދުވެގެން 37،396 މީހުން ޝަހީދުވެފައިވާއިރު، އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ.