ޔޫކްރޭނުން ބުނާ ގޮތުގައި އެގައުމުގެ ހަކަތަ އުފައްދާ ވަސީލަތްތަކަށް ރޭގަނޑު ރަޝިޔާއިން "ބޮޑު" ހަމަލާއެއް ދީފައިވާއިރު، މިއީ އެގައުމުގެ ޕަވަރ ގްރިޑަށް އަމާޒުކޮށްގެން އެންމެ ފަހުން ދިން ހަމަލާއެވެ.
މިއީ ފާއިތުވި ތިން މަސް ދުވަހުގެ ތެރޭގައި ރަޝިޔާއިން އެގައުމުގެ އެނާޖީ އިންފްރާސްޓްރަކްޗަރ ފެސިލިޓީތަކަށް ހަމަލާދޭ އަށްވަނަ ފަހަރު ކަމަށް ޔޫކްރޭންގެ އެނާޖީ މިނިސްޓްރީން ބުނެއެވެ.
އެއާ ޑިފެންސް ސިސްޓަމްތަކުން ރޭގަނޑު ބައެއް ސަރަހައްދުތަކަށް ރަޝިޔާއިން ފޮނުވާލި 16 މިސައިލްގެ ތެރެއިން 12 މިސައިލާއި 13 ޑްރޯން ވެސް ވައްޓާލި ކަމަށް ޔޫކްރޭންގެ ވައިގެ ސިފައިން ބުނެއެވެ.
ހޮނިހިރު ދުވަހު ޔޫކްރޭންގެ އިރުއުތުރުގެ ޚާރކިވްގެ އޮފިޝަލުން ބުނީ ރަޝިޔާގެ ގައިޑެޑް ބޮންތަކުގެ ސަބަބުން ދެ މީހަކު މަރުވެ 18 މީހަކު ޒަޚަމްވެފައިވާ ކަމަށާއި އެ ސިޓީގައި މަދުވެގެން ހަތަރު ގޮވުމުގެ އަޑު އިވިފައިވާ ކަމަށެވެ.
ހަކަތައާ ބެހޭ އިންފްރާސްޓްރަކްޗާއަށް ރޭގަނޑު ދިން ހަމަލާތަކުގައި މެދުތެރޭ ޒަޕޮރިޒްޒިއާ ސަރަހައްދުގައި ހަކަތަ މަސައްކަތްކުރާ ދެ މީހަކު ޒަޚަމްވެފައިވާއިރު، ހުޅަނގުގެ ސިޓީ ލްވިވްގައި ހަކަތަ އުފައްދާ ސާމާނަށް ގެއްލުން ލިބިފައިވާ ކަމަށް އޮފިޝަލުން އިތުރަށް ބުނެއެވެ.
އިވާނޯ-ފްރެންކިވްސްކްގެ ހުޅަނގު ދެކުނު ސަރަހައްދުގައި ވެސް ގެތަކާއި ކުޑަކުދިންގެ ސްކޫލަކަށް ގެއްލުން ލިބިފައިވާ ކަމަށް ކަމާބެހޭ ފަރާތްތަކުން ރިޕޯޓްކޮށްފައިވެއެވެ.
ރަޝިޔާއިން ވަނީ ބަހާރު މޫސުމާއި ހޫނު މޫސުމުގެ ކުރީކޮޅު ޔޫކްރޭންގެ ހަކަތައާ ބެހޭ އަމާޒުތަކަށް ހަމަލާދިނުމުގެ ކެމްޕޭން އާކޮށްފައެވެ. ރައީސް ވޮލޮޑިމިއާ ޒެލެންސްކީ ދާދި ފަހުން ވިދާޅުވީ މާޗް މަހުގެ ފަހުކޮޅު މޮސްކޯއިން ހަކަތަ އުފައްދާ ވަސީލަތްތައް ސުންނާފަތިކުރަން ފެށި ފަހުން އެގައުމުގެ ކަރަންޓް އުފެއްދުމުގެ ދެބައިކުޅަ އެއްބައި ވަސީލަތް ހަލާކުކޮށްލާފައިވާކަމަށެވެ.
ހޮނިހިރު ދުވަހުގެ ރޭ ދިން ހަމަލާއަކީ މި ހަފްތާގައި ހަކަތައާ ބެހޭ އިންފްރާސްޓްރަކްޗާއަށް އަމާޒުކޮށްގެން ދިން ދެވަނަ ހަމަލާއެވެ.
ބުރާސްފަތި ދުވަހު ޔޫކްރޭންގެ ކަމާބެހޭ ފަރާތްތަކުން ބުނެފައި ވަނީ ރޭގަނޑު ދިން ހަމަލާގައި ހަތް މުވައްޒަފަކު ޒަޚަމްވެ، އިންޖީނުގެއެއް ހިމެނޭ ގޮތަށް ހަކަތައާ ބެހޭ އިންފްރާސްޓްރަކްޗާއަށް ގެއްލުން ލިބިފައިވާ ކަމަށެވެ.
