ރަޝިޔާއާއެކު ވެފައިވާ ސަލާމަތީ އެއްބަސްވުމަކަށް ފަހު އުތުރު ކޮރެއާގެ ނުރައްކާތަކާ ކުރިމަތިލުމަށް ޖަޕާނާއި ދެކުނު ކޮރެއާ އަދި އެމެރިކާ ބައިވެރިވާ އަސްކަރީ ތަމްރީނުތައް ބޭއްވުމަށް މަތިންދާބޯޓު އުފުލާ ނިއުކްލިއަރ މަނަވަރެއް ހޮނިހިރު ދުވަހު ދެކުނު ކޮރެއާއަށް ގޮސްފިއެވެ.

ޔޫއެސްއެސް ތިއޯޑޯ ރޫޒްވެލްޓް ސްޓްރައިކް ގްރޫޕް ބޫސާނަށް ދިޔައީ ރަޝިޔާގެ ރައީސް ވްލަޑިމިއާ ޕޫޓިން އާއި އުތުރު ކޮރެއާގެ ލީޑަރު ކިމް ޖޮންގް އުން މި ހަފްތާގައި ހެދި ބޮޑު އެއްބަސްވުމާ ދެކޮޅަށް ދެކުނު ކޮރެއާއިން ރަޝިޔާގެ ސަފީރު ހާޒިރުކުރިތާ އެއް ދުވަސް ފަހުންނެވެ.

މި އެއްބަސްވުމުގައި ހަނގުރާމައެއް ހިނގައިފިނަމަ ދެފަރާތުންވެސް އަނެއް ގައުމަށް ދިފާއީ އެހީތެރިކަން ފޯރުކޮށްދޭނެ ކަމަށް ވައުދުވެއެވެ. ދެކުނު ކޮރެއާއިން ބުނާ ގޮތުގައި މި އެއްބަސްވުމަކީ އެގައުމުގެ ސަލާމަތަށް ނުރައްކާވާ އެއްބަސްވުމެއް ކަމަށާއި އޭގެ ރައްދުގެ ގޮތުން ރަޝިޔާގެ އަރައިގަތުމާ ދެކޮޅަށް ހަނގުރާމަ ކުރުމަށް އެހީތެރިވުމަށް ޔޫކްރޭނަށް ހަތިޔާރު ފޮނުވުމަށް ވިސްނަފާނެ ކަމަށް އިންޒާރު ދީފައިވެއެވެ.

ޖޫން މަހުގެ ކުރީކޮޅު ސިންގަޕޫރުގައި ދިފާއީ ވެރިންގެ ބައްދަލުވުމަކަށް ފަހު އެމެރިކާ، ދެކުނު ކޮރެއާ އަދި ޖަޕާނުން ވަނީ ފްރީޑަމް އެޖް ޑްރިލްތައް އިއުލާންކޮށްފައެވެ.

ޖޫން މަހުގެ ތެރޭގައި ފެށޭނެ ކަމަށް ބެލެވޭ މި ތަމްރީނުގައި ރޫޒްވެލްޓް ސްޓްރައިކް ގްރޫޕުން ބައިވެރިވާނެއެވެ.

ކެރިއާ ސްޓްރައިކް ގްރޫޕް ނައިންގެ ކޮމާންޑަރު ރިއަރ އެޑްމިރަލް ކްރިސްޓޮފާ އެލެގްޒެންޑާ ވިދާޅުވީ މި އެކްސަސައިޒަކީ އުޅަނދުފަހަރުގެ ޓެކްޓިކަލް ހުނަރު ވަރުގަދަކޮށް، ގައުމުތަކުގެ ކަނޑުގެ އަސްކަރިއްޔާގެ މެދުގައި އިންޓައޮޕަރޭބިލިޓީ އިތުރުކުރުމުގެ މަގްސަދުގައި ކުރިއަށް ގެންދާ އެކްސަސައިޒެއް ކަމަށެވެ.

ދެކުނު ކޮރެއާގެ ކަނޑުގެ އަސްކަރިއްޔާއިން ނެރުނު ބަޔާނެއްގައި ބުނީ އެ މަނަވަރު އައުމަކީ އެކުވެރި ގައުމުތަކުގެ ދިފާއީ ހަރުދަނާ ސިފަ ދައްކުވައިދޭ ކަމެއް ކަމަށާއި އުތުރު ކޮރެއާގެ ނުރައްކާތަކަށް ރައްދު ދޭން ފަސް ނުޖެހޭނެ ކަމަށެވެ. އެ މަނަވަރުން މިދަތުރުކޮށްފައި މިވަނީ އެމެރިކާގެ އިތުރު މަތިންދާބޯޓު އުފުލާ މަނަވަރެއް ކަމަށްވާ ޔޫއެސްއެސް ކާލް ވިންސަން އުތުރު ކޮރެއާއާ ދެކޮޅަށް ވަރުގަދަކަން ދެއްކުމުގެ ގޮތުން ދެކުނު ކޮރެއާއަށް އައިތާ ހަތް މަސް ފަހުންނެވެ.