ދިވެހިރާއްޖޭގެ އެންމެ މަގްބޫލު ޓީވީ ސްޓޭޝަން ކަމަށްވާ ޗެނަލް 13 ގެ އޮންލައިން ނިއުސް " ތޭރަ އޮންލައިން" ލޯންޗްކޮށްފިއެވެ.

ތޭރަ އޮންލައިން ލޯންޗްކޮށްފައިވަނީ އާދިއްތަ ދުވަހުއެވެ.

އެކި އެކި ދާއިރާތަކުގެ ޚަބަރު ކިޔުންތެރިންނަށް ވެބްސައިޓްގައި ޚާއްސަ ކުރެވިފައިވާނެއެވެ. އެގޮތުން ސިޔާސީ ދާއިރާ އާއި، ވިޔާފަރި، ބޭރުގެ ދުނިޔެ ހިމެނެއެވެ.

އިތުރު މައުލޫމާތު ދެމުން ޗެނަލް 13 ގެ ސީއީއޯ އިސްމާއިލް ސޮފްވާން ވިދާޅުވީ "ތޭރަ އޮންލައިން" ގެ މަގްސަދަކީ ޓީވީގެ ޚަބަރު ގަޑި ތަކުގެ އިތުރުންވެސް ރާއްޖެ އަދި ދުނިޔޭގެ ކަންކަމަށް އަލި އަޅުވާލާ ކިޔުންތެރިންނާ ހަމަޔަށް ވީ އެންމެ އަވަހަކަށް ޚަބަރުތައް ގެނެސްދިނުމެވެ.

ތޭރަ އޮންލައިންގެ ވެބްސައިޓުން ހުރިހާ ފަރާތްތަކަށްވެސް ޗެނަލް 13 ގެ ލައިވް ސްޓްރީމްވެސް ބަލާލެވޭނެއެވެ.

ކިޔުންތެރިންނަށް ޚާއްސަކޮށްގެން މި ވެބްސައިޓް ހުޅުވާލެވިފައިވާ އިރު ތޭރަ އޮންލައިން އިން ޝާއިއު ކުރާ ޚަބަރުތައް ވެގެންދާނީ ތެދު މައުލޫމާތު އޭގައި އެކުލެވިގެންވާނެ އޮންލައިން ނޫހަކަށެވެ.