ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުއްލި ގޮތަކަށް ސިންގަޕޫރަށް ކުރެއްވި ނުރަސްމީ ދަތުރުފުޅު ނިންމަވާލެއްވުމަށްފަހު ރާއްޖެ ވަޑައިގަތުމާއި، ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމް މަގާމުން އިސްތިއުފާ ދެއްވުމާ ދިމާވުމަކީ ހަމައެކަނި އިއްތިފާގެއް ކަމަށް ގަބޫލުކުރަން ގިނަ ބަޔަކަށް މިއަދު ވަނީ ދަތިވެފައެވެ. ސިޔާސީ މަސްރަހު ދިރާސާކުރާ ފަރާތްތަކުން ސިފަކުރާ ގޮތުގައި، މިއީ ސަރުކާރުގެ އެތެރޭގައި ހިނގަމުންދާ ބޮޑު "ގޭމެއް" ނުވަތަ ވަކި ބަޔަކު ކަކޫޖެއްސުމަށް ރޭވި އުކުޅެކެވެ.
ދިއްގަރު ދާއިރާގެ މެންބަރު އަހްމަދު ނާޒިމް މަގާމުން ވަކިކުރުމުގެ މައްސަލަ މަޖިލީހުގެ އެޖެންޑާގައި އޮއްވައި، ކުއްލި ގޮތަކަށް އޭނާ އިސްތިއުފާ ދެއްވުމަކީ ސަރުކާރުގެ ނުފޫޒާއި ބިރުދެއްކުން އިންތިހާއަށް އޮތް ކަމުގެ ހެއްކެކެވެ. ނާޒިމްގެ މައްޗަށް ކުރެވޭ ތުހުމަތުތަކަކީ އަސާސެއް ނެތް ކަންތައްތަކެއް ކަމަށް އޭނާ ވިދާޅުވާއިރު، އެފަދަ ތުހުމަތުތަކެއް ކުރިމަތިކުރުވައިގެން މަގާމުން ދުރުކުރަން އުޅުމަކީ ސަރުކާރަށް ނުކިޔަމަންތެރިވާ ފަރާތްތަކަށް ދޭ "ސިގްނަލެއް" ކަމަށް ބެލެވެއެވެ.
ރައީސް މުއިއްޒު ސިންގަޕޫރު ދަތުރާއި ދިމާކޮށް ނާޒިމް އިސްތިއުފާ ދެއްވުމަކީ، ކުރީގެ ރައީސް މުހައްމަދު ނަޝީދު ތުހުމަތު ކުރައްވާ ފަދައިން، ބޭރު ގައުމެއްގައި ތިބެގެން ހިންގި ސިޔާސީ "ޑީލް" އެއްގެ ނަތީޖާ ކަމަށް ބެލުމުގެ ފުރުސަތު ބޮޑެވެ. ޚާއްޞަކޮށް ވިފާގުގެ މަރުގެ މައްސަލައިގެ ތުހުމަތުތައް ފަދަ ނާޒުކު ކަންކަން ހަތިޔާރަކަށް ބޭނުންކޮށްގެން، ސިޔާސީ ބޭނުމަކަށްޓަކައި މީހުން ބިރުގަންނަވައި ކަކޫޖެއްސުމަކީ މި ސަރުކާރުގެ މިސްރާބު ހުރި ގޮތް ކަމަށް ގިނަ މީހުން އަންނަނީ ބުނަމުންނެވެ.
މި ހާދިސާތަކުން ދޭހަވަނީ ސަރުކާރުގެ އެތެރޭގައި ބޮޑެތި ރެނދުތަކެއް އަޅާފައިވާ ކަމެވެ. ރައީސްގެ ކުއްލި ދަތުރުފުޅާއި، އެއާ ގުޅިގެން މަޖިލީހުގެ މުހިންމު މަގާމެއްގައި ހުންނެވި ބޭފުޅަކު އިސްތިއުފާ ދެއްވަން ޖެހުމަކީ ޑިމޮކްރެޓިކް ހަމަތަކާ ޚިލާފު، އަދި ނުފޫޒުން ފުރިގެންވާ އަމަލެކެވެ. ސަރުކާރުން ރަސްމީކޮށް މިކަމުގައި ހަނު އޮތުމަކީ މި ތުހުމަތުތަކަށް ލިބޭ އިތުރު ބާރެކެވެ.
ޖުމްލަގޮތެއްގައި ބަލާއިރު، ނާޒިމްގެ އިސްތިއުފާއަކީ އަމިއްލަ އިޚްތިޔާރުގައި ކުރެއްވި ކަމަކަށްވުރެ ބޮޑަށް، ސިންގަޕޫރުގެ "މޭޒުދަށުން" ނިންމާލި ބިރުދެއްކުމުގެ ނަތީޖާއެއް ކަމަށް ސިޔާސީ މަސްރަހުން ފެންނަ މަންޒަރުތަކުން ކަށަވަރުވެއެވެ.
