ފަލަސްތީނުގެ އުތުރުގައި އޮންނަ ޣައްޒާ ސިޓީގެ ޑިސްޓްރިކްޓްތަކަށް އިސްރާއީލުން ހޮނިހިރު ދުވަހު ދިން ހަމަލާތަކުގައި 42 މީހުން ޝަހީދުވެފައިވާ ކަމަށް ޣައްޒާގެ މީޑިއާ އޮފީހުގެ ޑިރެކްޓަރު ވިދާޅުވެއްޖެއެވެ.

ޣައްޒާގެ ތާރީހީ އަށް ރެފިއުޖީ ކޭމްޕްގެ ތެރެއިން އެއް ކޭމްޕް ކަމަށްވާ އަލްޝާތީގެ ގެތަކަށް އިސްރާއީލުން ދިން އެއް ހަމަލާގައި 24 މީހުން ޝަހީދުވެފައިވާ ކަމަށް އިސްމާއިލް އަލް ތަވާބްތާ ރޮއިޓާސް އަށް ވިދާޅުވިއެވެ. އަދި އަލް ތުއްފާގެ ގެތަކަށް ދިން ހަމަލާއެއްގައި ފަލަސްތީނުގެ އިތުރު 18 މީހަކު ޝަހީދުވެފައިވެއެވެ.

ހަމަލާތަކާ ގުޅިގެން އިސްރާއީލުގެ އަސްކަރިއްޔާއިން ނެރުނު ކުރު ބަޔާނެއްގައި ބުނެފައި ވަނީ "މީގެ ކުޑައިރުކޮޅެއް ކުރިން އައިޑީއެފްގެ ޖެޓްތަކުން ވަނީ ޣައްޒާ ސިޓީ ސަރަހައްދުގައި ހުރި ހަމާސްގެ އަސްކަރީ އިންފްރާސްޓްރަކްޗާގެ ދެ ސައިޓަކަށް ހަމަލާދީފަ" ކަމަށެވެ.

ހަމާސްއިން ނެރުނު ބަޔާނެއްގައި ބުނެފައި ވަނީ އެ ހަމަލާތައް އަމާޒުކޮށްފައިވަނީ އާންމު އާބާދީއަށް ކަމަށާއި ރައްޔިތުންނާ ދެކޮޅަށް ހިންގާ ޖަރީމާތަކުގެ ބަދަލު ހިފާނެކަމަށެވެ.

ފޫޓޭޖުތަކުން ފެންނަ ގޮތުގައި ފަލަސްތީނުގެ އެތައްބަޔަކު ހަމަލާއަށް ފަހު އޭގެ ޝިކާރައަކަށް ވެފައިވާ މީހުން ހޯދުމަށް ދުވެފައި ގޮސް ބިމާހަމަވެފައިވާ ގެތަކުގެ މީހުން ހޯދުމުގެ މަސައްކަތް ކުރާތަން ފެނެއެވެ.

ހައްދުފަހަނައަޅާފައިވާ އިސްރާއީލްގެ މިފަދަ އެތައް ހަމަލާތަކުގެ ސަބަބުން ޣައްޒާ ފަނާވެ، 37،400 އަށް ވުރެ ގިނަ މީހުން ޝަހީދުވެފައިވާއިރު، އޭގެ ތެރެއިން 101 މީހަކު ފާއިތުވި 24 ގަޑިއިރުގެ ތެރޭގައި ޝަހީދުވެފައިވެއެވެ.

ހަނގުރާމައަށް އަށް މަހަށް ވުރެ ގިނަ ދުވަސް ވެފައިވާއިރު، އިސްރާއީލުގެ ކުރިއެރުން މިހާރު ފޯކަސްކޮށްފައިވަނީ އެގައުމުގެ ސިފައިންނަށް އަދިވެސް ހިފިފައި ނުވާ ދެ ސަރަހައްދު ކަމަށްވާ ދެކުނު އައްސޭރީގައި އޮންނަ ރަފާހާއި މެދުތެރޭގައި އޮންނަ ދައިރް އަލްބަލާހް ވަށައިގެންވާ ސަރަހައްދަށެވެ.