މިއަހަރުގެ ހައްޖުގެ އަޅުކަން އަދާކުރުމުގެ ތެރޭގައި 1،000 އަށް ވުރެ ގިނަ މީހުން މަރުވެފައިވާ ކަމަށް ސައުދީ އަރަބިއްޔާގެ އޮފިޝަލުން ހާމަކޮށްފިއެވެ.

މަރުވި މީހުންގެ ދެބައިކުޅަ އެއްބައި މީހުންނަކީ މިސްރުގެ މީހުން ކަމަށް މިސްރުގެ ދެ އޮފިޝަލަކު އެސޯސިއޭޓެޑް ޕްރެސްއަށް މައުލޫމާތު ދިނެވެ. އަދި ހުއްދަ ނެތި ހައްޖުވެރިން ސައުދީ އަރަބިއްޔާއަށް ދަތުރުކުރުމަށް އެހީތެރިވެދިން 16 ޓްރެވަލް އެޖެންސީއެއްގެ ލައިސަންސް މިސްރުން ބާތިލްކޮށްފައިވާ ކަމަށްވެސް ކަމާބެހޭ ފަރާތްތަކުން ބުނެއެވެ.

ކުޅަދާނަ ކޮންމެ މުސްލިމަކަށް ވެސް އުމުރުގައި އެއްފަހަރު ލާޒިމުކުރާ ހައްޖު ދަތުރުގައި މަރުވި މީހުންނާ ގުޅޭ ގޮތުން ސައުދީ އަރަބިއްޔާއިން ރަސްމީކޮށް އެއްވެސް އެއްޗެއް އަދި ބުނެފައެއް ނުވެއެވެ.

މިއަހަރުގެ ހައްޖުގައި ދިގުމުއްދަތުގެ ބަލިތަކުގެ ސަބަބުން ހުއްދަ ލިބިފައިވާ 31 ހައްޖުވެރިން މަރުވިކަން މިސްރު ސަރުކާރުން އިއުލާން ކުރި ނަމަވެސް އެހެން ހައްޖުވެރިންގެ ރަސްމީ އަދަދެއް ހާމަކޮށްފައެއް ނުވެއެވެ.

ނަމަވެސް މިސްރުގެ ކެބިނެޓްގެ އޮފިޝަލަކު އެޕީއަށް ވިދާޅުވީ ހައްޖު ދަތުރުގައި މަދުވެގެން އިތުރު 630 މިސްރު މީހުން މަރުވެފައިވާ ކަމަށާއި އެންމެ ގިނައިން ރިޕޯޓްކޮށްފައިވަނީ މައްކާގެ އަލް މުއައިސަމް އިމަޖެންސީ ކޮމްޕްލެކްސްގައި ކަމަށެވެ.  މި އަދަދު ކަށަވަރުކޮށްދެމުން މިސްރުގެ ޑިޕްލޮމެޓަކު ވިދާޅުވީ މަރުވި މީހުންގެ ތެރެއިން ގިނަ މީހުން ވަޅުލާފައިވަނީ ސައުދީ އަރަބިއްޔާގައި ކަމަށެވެ.

ސައުދީގެ ކަމާބެހޭ ފަރާތްތަކުން ވަނީ ހުއްދަ ނެތި ދަތުރުކުރި އެތައް ހާސް ހައްޖުވެރިންނާ ދެކޮޅަށް ފިޔަވަޅު އަޅައި އަނބުރާ ފޮނުވާލާފައެވެ. އެކަމަކު ގިނަ ބަޔަކު، ގިނައީ މިސްރު މީހުން، މައްކާ އާއި ވަށައިގެންވާ މާތް ތަންތަނަށް ވާސިލްވެވުނު އިރު، ބައެއް މީހުން ދިޔައީ ހިނގާފައެވެ.  ހުއްދަ ލިބިފައިވާ ހައްޖުވެރިންނާ ހިލާފަށް އެމީހުން ހޫނުން ސަލާމަތްވާން ވަންނާނެ ހޮޓަލެއް ނެތެވެ.

މިސްރުގެ ސަރުކާރުން ނެރުނު ބަޔާނެއްގައި ބުނެފައިވަނީ އެ 16 ޓްރެވަލް އެޖެންސީން ހައްޖުވެރިންނަށް އެކަށީގެންވާ ހިދުމަތެއް ފޯރުކޮށްދީފައި ނުވާ ކަމަށެވެ. އަދި އެ އެޖެންސީތަކުން ގަވައިދާ ހިލާފަށް ހައްޖުވެރިންނަށް މައްކާއަށް ދަތުރު ނުކުރެވޭ ވިސާ ބޭނުންކޮށްގެން ސައުދީ އަރަބިއްޔާއަށް ދިއުމަށް މަގުފަހިކޮށްދީފައިވާ ކަމަށް އެ ބަޔާނުގައި ވެއެވެ.

އެ ކުންފުނިތަކުގެ އޮފިޝަލުންގެ މައްޗަށް ޖިނާއީ ތަހުގީގު ކުރުމަށް ޕަބްލިކް ޕްރޮސެކިއުޓަރަށް ފޮނުވާފައިވާ ކަމަށް ވެސް މިސްރު ސަރުކާރުން ބުންޏެވެ.

އެސޯސިއޭޓެޑް ޕްރެސްގެ ތަފާސް ހިސާބުތަކުން ދައްކާ ގޮތުގައި އިންޑޮނޭޝިއާގެ 165 ހައްޖުވެރިންނާއި އިންޑިއާގެ 98 މީހުންނާއި އުރުދުން، ޓިއުނީޝިއާ، މޮރޮކޯ، އަލްޖީރިއާ އަދި މެލޭޝިއާގެ ހައްޖުވެރިން ވެސް މަރުވިއެވެ. އެމެރިކާގެ ދެ ހައްޖުވެރިން ވެސް މަރުވެފައިވާ ކަމަށް ރިޕޯޓްކޮށްފައިވެއެވެ.

މަރުވާން ދިމާވީ ހޫނު ގަދަވުމުގެ ސަބަބުން ކަމަށް އުރުދުން އާއި ޓިއުނީޝިއާ ފަދަ ބައެއް ގައުމުތަކުން ބުނެފައިވެއެވެ.

2 މިލިއަނަށް ވުރެ ގިނަ މީހުން ސައުދީ އަރަބިއްޔާއަށް ދަތުރުކުރާ ހައްޖުގައި މަރުވުމަކީ އާންމު ކަމެކެވެ. ނަމަވެސް މިއަހަރު މި އަދަދު އާދަޔާ ހިލާފަށް ގިނަ ކަމުން ދޭހަވަނީ ހާއްސަ ހާލަތްތަކެއް ކުރިމަތިވެފައިވާ ކަމެވެ.

2015 ވަނަ އަހަރު ހައްޖު ދުވަސްވަރު މީނާގައި ހިނގި ފިތިބާރުވުމެއްގައި 2،400 އަށް ވުރެ ގިނަ ހައްޖުވެރިން މަރުވެފައިވާއިރު، މިއީ މިހާތަނަށް ހައްޖުގެ އަޅުކަމުގައި ހިނގި އެންމެ ގިނަ މީހުން މަރުވި ހާދިސާއެވެ. ހަމަ އެ އަހަރުގެ ކުރީކޮޅު މައްކާގެ ހަރަމްފުޅުގައި ކްރޭނެއް ވެއްޓި 111 މީހުން މަރުވެފައިވެއެވެ.

ހައްޖުގައި ދެވަނައަށް އެންމެ ގިނަ މީހުން މަރުވި ހާދިސާއަކީ 1990 ވަނަ އަހަރު ހިނގި ފިތިބާރުވުމެއްގައި 1،426 މީހުން މަރުވި ހާދިސާއެވެ.

މިއަހަރުގެ ހައްޖު ދުވަސްވަރު މައްކާ އާއި ވަށައިގެންވާ މުޤައްދަސް ތަންތަނުގައި ދުވާލަކު ހޫނުމިން 46 ޑިގްރީ ސެލްސިއަސް އާއި 49 ޑިގްރީ ސެލްސިއަސް އާއި ދެމެދުގައި ހުރި ކަމަށް ސައުދީ ނޭޝަނަލް ސެންޓަރ ފޯ މީޓިއޮރޮލޮޖީން ބުނެއެވެ.