އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ބުނިގޮތުގައި ޣައްޒާގެ ދެކުނުގެ ރަފާހުގައި ހަނގުރާމައިގެ "އެންމެ ވަރުގަދަ މަރުހަލާ" ނިމުމާ ގާތްވެފައިވާ ކަމަށާއި ނަމަވެސް އޭގެ މާނައަކީ ހަނގުރާމަ ނިމުމަކަށް އަންނަ ކަމަކަށް ނުވާނެ ކަމަށާއި ހަމާސް ވެރިކަމުން މުޅިން ދުރުވާންދެން ހަނގުރާމަ ކުރިއަށް ގެންދާނެ ކަމަށެވެ.

އޭނާ އިތުރަށް ބުނީ އިސްރާއީލުގެ އަސްކަރިއްޔާއަށް ވަރަށް އަވަހަށް ލުބުނާނުގެ ބޯޑަރަށް ސިފައިން އަލުން ފޮނުވާލެވޭނެ ކަމަށާއި ހިޒްބުاللهއާ އެކު ހަމަލާ ބަދަލުކުރުންތައް ގޯސްވަމުން އަންނަ ކަމަށެވެ.

އަދި ހުޅަނގު އައްސޭރީގައި ހުންނަ ފަލަސްތީނު ސަރުކާރުން ހަމާސްގެ ބަދަލުގައި ޣައްޒާ ހިންގަން ޖެހޭ ކަމަށް ބުނާ ޚިޔާލު ވެސް ނަތަންޔާހޫ ވަނީ ދެކޮޅު ހަދާފައެވެ.

“އާޚިރުގައި ދެ ކަމެއް ކުރަން ޖެހޭނެ: އިސްރާއީލުގެ ދިފާއީ ބާރުން މިހާރު ހިނގަމުންދާ އަސްކަރީ ޑިމިލިޓަރައިޒޭޝަނަށް ބޭނުންވާނެ އަދި މަދަނީ ވެރިކަމެއް ގާއިމް ކުރަން ޖެހޭނެ، އަޅުގަނޑު އުންމީދު ކުރަން މި ސަރަހައްދުގެ ވަކި ގައުމުތަކުގެ ތާއީދާއި މެނޭޖްމަންޓާއެކު،  އަޅުގަނޑަށް ފެންނަ ފެނުމުގައި މިއީ ކުރިއަށް ދިއުމަށް ރަނގަޅު ގޮތް... އަޅުގަނޑު ދަންނަވާނަން އަޅުގަނޑު ތައްޔާރަށް ނެތް ކަމެއް، އަޅުގަނޑު ތައްޔާރެއް ނޫން އެތަނުގައި ފަލަސްތީނުގެ ދައުލަތެއް ގާއިމް ކުރަން، އަޅުގަނޑު ތައްޔާރެއް ނޫން ފަލަސްތީނު އޮތޯރިޓީއާ ހަވާލުކުރަން. އަޅުގަނޑު އެކަން ކުރަން ތައްޔާރެއް ނޫން." ނަތަންޔާހޫ އިސްރާއީލުގެ ޓީވީއަށް ދިން އިންޓަވިއުއެއްގައި ބުންޏެވެ.

އިސްރާއީލުގެ އަސްކަރިއްޔާއިން ހަމާސް ނައްތާލުމަށް ކަމަށް ބުނެ ޣައްޒާގައި ހިންގަމުންދާ ގަތުލުއާންމުގައި 37،551 އަށް ވުރެ ގިނަ މީހުން ޝަހީދުވެފައިވެއެވެ. އޭގެތެރޭގައި ގިނައީ އަންހެނުންނާއި ކުޑަކުދިންނެވެ.