ދެކުނު ކޮރެއާގައި ހޯމަ ދުވަހު ލިތިއަމް ބެޓެރީ ފެކްޓްރީއެއްގައި ހިނގި އަލިފާނުގެ ހާދިސާއެއްގައި 22 މުވައްޒަފުން މަރުވެފައިވާއިރު އޭގެ ތެރެއިން ގިނައީ ޗައިނާގެ ރައްޔިތުން ކަމަށް އޮފިޝަލުން ބުނެފިއެވެ.

މިހާރު ވަރަށް ބޮޑަށް ނިއްވާލާފައިވާ އަލިފާންގަނޑު ފަޅައިގެން ގޮސްފައިވަނީ ވެރިރަށް ސޯލްގެ ހުޅަނގު ދެކުނުން ގާތްގަނޑަކަށް 90 މިނެޓް ދުރުގައި އޮންނަ ބޮޑު ސިނާއީ ސަރަހައްދެއް ކަމަށްވާ ހަވާސެންގްގައި ހުންނަ ބެޓެރީ އުފައްދާ ކުންފުނި އެރިސެލް އިން ހިންގާ ފެކްޓްރީއެއްގައެވެ.

މަރުވި މީހުންގެ ތެރޭގައި ޗައިނާގެ 18 މީހުންނާއި ލާއޯސް މީހަކު ހިމެނެއެވެ. ބާކީ ތިބި މީހުންގެ އައިޑެންޓިޓީ އަދި ކަށަވަރު ނުވެއެވެ.

އަލިފާން ރޯވާން ފެށީ ހެނދުނު 10:31 ހާއިރު ގައި 35،000 އެއްހާ ޔުނިޓް ހިމެނޭ ގުދަނެއްގެ ތެރޭގައި ބެޓެރީ ސެލްތަކެއް ގޮވުމުންނެވެ. ގޮވުން މެދުވެރިވީ ކޮން ސަބަބަކާ ހުރެ ކަމެއް އަދި ސާފެއް ނުވެއެވެ.

މަންޒަރު ދުށް މީހަކު ރޮއިޓާސް އަށް ދިން އިންޓަވިއުއެއްގައި ބުނީ ފަޔާ ފައިޓަރުން ހަ ހަށިގަނޑު ފެކްޓްރީން ބޭރަށް ގެންދިޔަތަން ފެނުނުކަމަށެ. އަލިފާނުގެ ހާދިސާގެ ބާރުގަދަކަމުން ސަލާމަތްކުރާ ފަރާތްތަކަށް މަރުވެފައިވާ މީހުން ދެނެގަތުމަށް ދަތިތަކެއް ކުރިމަތިވަމުން ދިޔައެވެ.

ވަރަށް ބޮޑަށް ފިހިގެން ދެ މީހަކަށް ފަރުވާ ދެމުން އަންނަ ކަމަށް އެ ހާދިސާ ހިނގި ސަރަހައްދުގައި ތިބި އޮފިޝަލުން ބުންޏެވެ.

ޑެޔޮން ޔުނިވާސިޓީގެ ފަޔާ އެންޑް ޑިޒާސްޓާ ޕްރިވެންޝަން ޕްރޮފެސަރު ކިމް ޖޭ-ހޯ ވިދާޅުވީ އަލިފާން ގަނޑު މަސައްކަތްތެރިން ސަލާމަތްވެވޭނެ ވަރަށްވުރެން އަވަހަށް ފެތުރިފައިވާ ކަމަށް ބެލެވޭ ކަމަށެވެ.

ނިކަލް ފަދަ ބެޓެރީ މާއްދާތަކަކީ ވަރަށް ފަސޭހައިން އަލިފާން ރޯވާ އެއްޗެކެވެ. "އެހެން މެޓީރިއަލްތަކުގެ ސަބަބުން އަލިފާނުގެ ހާދިސާއެއް ހިނގައިގެން އުޅޭ އިރާ ޚިލާފަށް، ގިނަ ފަހަރަށް ސަލާމަތް ވާން އެކަށީގެންވާ ވަގުތެއް ނުލިބޭ."

ރައީސް ޔޫން ސުކް ޔޯލް ހާލަތު ބައްލަވަމުން ގެންދަވާއިރު، ދާޚިލީ ވަޒީރު ލީ ސަންގް-މިން ވަނީ ނުރައްކާތެރި އެއްވެސް ކެމިކަލަކުން ވަށައިގެންވާ ސަރަހައްދު ތަޣައްޔަރުވިޔަ ނުދިނުމަށް އަޅަންޖެހޭ ފިޔަވަޅުތައް އެޅުމަށް އެގައުމުގެ ކަމާބެހޭ ފަރާތްތަކަށް ގޮވާލައްވާފައެވެ.