ގާތްގަނޑަކަށް މަހެއްހާ ދުވަސް ވެފައިވާ ފެންބޮޑުވުން ތަކުގެ ސަބަބުން އުތުރު ބަންގްލަދޭޝްގައި މިހާރު 111 މީހުން މަރުވެފައިވާ ކަމަށް ކަމާބެހޭ ފަރާތްތަކުން ހޮނިހިރު ދުވަހު ބުނެފިއެވެ.

ޖޫން މަހުގެ ފަހުކޮޅު މޫސުމީ ވިއްސާރަ ފެށުނު ފަހުން ހާލަތު ގޯސްވަމުންދާއިރު، ފެންބޮޑުވި ސަރަހައްދުތަކުގައި އިތުރު 11 މީހަކު މަރުވެފައިވާ ކަމަށް ރިޕޯޓްކޮށްފައިވެއެވެ.

އެގައުމުގެ ސިއްހީ އިދާރާތަކުން ބުނާ ގޮތުގައި ފާއިތުވި 25 ދުވަހުގެ ތެރޭގައި ތިރި ސަރަހައްދުތަކުގައި 9،500 އާ ގާތްކުރާ އަދަދަކަށް މީހުން ވަނީ ފެނުން ޖެހޭ ބަލިތަކުގެ ޝިކާރައަކަށް ވެފައެވެ.

އިންޓަނޭޝަނަލް ފެޑެރޭޝަން އޮފް ރެޑްކްރޮސް އެންޑް ރެޑް ކްރެސެންޓް ސޮސައިޓީސް އިން ލަފާކުރާ ގޮތުގައި ބަންގްލަދޭޝްގެ ގާތްގަނޑަކަށް ތިންބައިކުޅަ އެއްބައި މީހުންނަށް އަސަރުކޮށްފައިވާއިރު، ކުރިއަށް އޮތް ދުވަސްތަކުގައި އިތުރު ވާރޭވެހި ފެންބޮޑުވުން އެކަށީގެންވާތީ ހާލަތު ގޯސްވުން އެކަށީގެންވެއެވެ.

މި ހަފްތާގެ ކުރީކޮޅު ޔުނިސެފުން ބުނީ ގާތްގަނޑަކަށް 1.3 މިލިއަން ކުޑަކުދިން ހިމެނޭ ގޮތަށް 2.4 މިލިއަނަށް ވުރެ ގިނަ މީހުންނަށް އަސަރުކޮށްފައިވާ ކަމަށާއި ބައި މިލިއަނަށް ވުރެ ގިނަ އާއިލާ ގެދޮރު ދޫކޮށް އެހެން ހިސާބުތަކަށް ބަދަލުވެފައިވާ ކަމަށެވެ.

މީގެ އިތުރުން މުޅި ބަންގްލަދޭޝްގައި ކޮރޯނާ ވައިރަސްގެ ކޭސްތައް އިތުރުވަމުން އަންނައިރު، ފާއިތުވި 24 ގަޑިއިރުގެ ތެރޭގައި 2،520 މީހުން އިތުރުވުމާއެކު ޖުމްލަ އަދަދު ވަނީ 221،178 އަށް އަރައިފިއެވެ.

ފާއިތުވި ދުވަހުގެ ތެރޭގައި އިތުރު 38 މީހަކު މަރުވެފައިވާއިރު، ކޮވިޑް-19 ޖެހިގެން މަރުވި މީހުންގެ އަދަދު ވަނީ 2،874 އަށް އަރާފައެވެ.

އަދި ބަލިން ރަނގަޅުވި މީހުންގެ އަދަދު 1،114 އިތުރުވެ 122،090 އަށް އަރާފައިވާ ކަމަށް ހެލްތު މިނިސްޓްރީން ބުނެއެވެ.

ބަންގްލަދޭޝްގައި މިހާތަނަށް 1.1 މިލިއަނަށްވުރެ ގިނަ ޓެސްޓު ހެދިއިރު، ފާއިތުވި ދުވަހުގެ ތެރޭގައި އިތުރު 10،446 ސާމްޕަލް ވަނީ ޓެސްޓްކޮށްފައެވެ.