ޣައްޒާ ސަރަހައްދުގައި ހުންނަ އދ.ގެ ހިންގާ ސްކޫލަކަށް އިސްރާއީލުން ދިން ވައިގެ ހަމަލާއެއްގައި 16 މީހުން ޝަހީދުވެ 10 މީހުން ޒަޚަމްވެފައިވާ ކަމަށް ފަލަސްތީނުގެ އޮފިޝަލުން ބުނެފިއެވެ.

އެ އިމާރާތުގައި ހިޔާވަހިކަން ހޯދަމުން ދިޔައީ މެދުތެރޭ ޣައްޒާގެ ނޫސެއިރާތު ރެފިއުޖީ ކޭމްޕްގައި ގެދޮރު ގެއްލިފައިވާ އެތައް ހާސް ބަޔަކެވެ.

އިސްރާއީލުން ބުނީ ހަމާސްގެ ބައެއް "އަލްޖައުނީ ސްކޫލް ސަރަހައްދުގައި ހުންނަ ސްޓްރަކްޗަރތަކުގައި ހަރަކާތްތެރިވާ ޓެރަރިސްޓުންނަށް" ހަމަލާދީފައިވާ ކަމަށެވެ.

މި ހަމަލާ ދީފައިވަނީ އިސްރާއީލާއި ހަމާސްއާ ދެމެދު އެއްބަސްވުމެއް އުފެދިފައިވާ ކަމުގެ އުންމީދުތައް ބޮޑުވަމުން އަންނަ ދަނޑިވަޅެއްގަ އެވެ.

އިސްރާއީލުން ވަނީ ހަމާސްއިން އޮކްޓޯބަރ 7 ގައި ހައްޔަރުކުރި އިސްރާއީލު މީހުން ދޫކޮށްލުމުގެ އެއްބަސްވުމާ ބެހޭ ގޮތުން މަޝްވަރާ ކުރުމަށް އަންނަ ހަފްތާގައި ނެގޯޝިއޭޓަރުންގެ ޓީމެއް ފޮނުވާނެ ކަމަށް އިއުލާންކޮށްފަ އެވެ.