ޔަހޫދީން ހުއްޓުމެއްނެެތި ޣައްޒާއަށް ދެމުން އަންނަ ހަމަލާތަކުގައ ތެރެއިން މިއަދު ޣައްޒާގެ ބުރެއިޖް ރެފިއުޖީ ކޭމްޕަށް ބޮން އަޅައި 6 މީހަކު ޝަހީދުކޮށްލައިފި އެވެ.

ޣައްޒާގައި ހަރަކާތްތެރިވާ އަލްޖަޒީރާގެ ނޫސްވެރިޔާ އާއި ވަފާ ނިއުސް އެޖެންސީން ރިޕޯޓްކޮށްފައިވާ ގޮތުގައި ބުރެއިޖް ރެފިއުޖީ ކޭމްޕްގެ ގެއަކަށް އަމާޒުކޮށް އިސްރާއީލުން ދިން ވައިގެ ހަމަލާއެއްގައި 6 މީހަކު މަރުވެ އެތައް ބަޔަކު ވަނީ ޒަހަމްވެފައި އެވެ.

އަދި ހަމަލާގައި ޝަހީދުވި މީހުންގެ ތެރޭގައި އަންހެނުންނާއި ކުޑަކުދިންވެސް ހިމެނޭ ކަމަށް ރިޕޯޓުތައް ބުނެއެވެ.

ޔަހޫދީން ބުރެއިޖް ރެފިއުޖީ ކޭމްޕަށް ހަމަލާދިން އިރު މިއަދުގެ ފަތިހުން ފެށިގެން ޣައްޒާގެ ޚާން ޔޫނުސްގެ ސަރަހައްދުތަކަށްވެސް ޔަހޫދީން ހަމަލާދީ ގިނަ ބަޔަކު ޝަހީދުކޮށްލާފައިވާ ކަމަށް ރިޕޯޓުތައް ބުނެއެވެ.

ޔަހޫދީންގެ ހަމަލާތަކުގައި މިހާތަނަށް ޣަައްޒާއިން 39,677 މީހުން ވަނީ ޝަހީދުވެފައި އެވެ. އަދި ހަމަލާތައް ހުއްޓާލުމަށް ދުނިޔޭގެ އެކި ގައުމުތަކުން ގޮވާލަމުން އަންނަ ގޮވާލުންތަކަށް ޔަހޫދީން ދެމުން އަންނަނީ ބީރު ކަންފަތެކެވެ.