ޔަހޫދީ އިޒްރޭލުގެ އަސްކަރިއްޔާއިން އަނެއްކާވެސް ޣައްޒާގެ ސްކޫލަކަށް ބޮން އަޅައިފި އެވެ.
އަލްޖަޒީރާއިން ރިޕޯޓުކުރާ ގޮތުގައި ޔަހޫދީން މިއަދު ބޮން އަޅާފައިވަނީ ޣައްޒާސިޓީގެ ހުޅަނގުން ގެދޮރު ގެއްލިފައިވާ މީހުން ބޯހިޔާވަހިކަން ހޯދަމުން ދިޔަ މުސްތަފާ ހާފިޒް ސްކޫލަށެވެ.
ޣައްޒާގައި ހުންނަ ފަލަސްތީނުގެ ސިވިލް ޑިފެންސުން ބުނީ އެ ސްކޫލަށް ހަމަލާދިން ކަމުގެ ރިޕޯޓް ލިބުމާ އެކު ސިއްހީ ހިދުމަތްތެރިންގެ ޓީމުތައް އެ ތަނަށް ފޮނުވަމުން އަންނަ ކަމަށެވެ.
ޣައްޒާ ސިޓީގެ މުސްތަފާ ހާފިޒް ސްކޫލަށް އިސްރާއީލުން ދިން ހަމަލާގައި މިހާތަނަށް ތިން މީހަކު ޝަހީދުވެފައިވާ ކަމަށް އަލްޖަޒީރާ އަރަބިކްއިން ވަނީ ރިޕޯޓުކޮށްފައެވެ.
އިސްރާއީލުގެ އަސްކަރިއްޔާއިން ބުނެފައިވަނީ މި ހަމަލާ އަމާޒުކޮށްފައިވަނީ ސްކޫލުގައި ފޮރުވިގެންތިބި "ކޮމާންޑް ސެންޓަރެއް" ބޭނުންކުރި ހަމާސްގެ ހަނގުރާމަވެރިންނަށް ކަމަށެވެ.
އިސްރާއީލުގެ އަސްކަރިއްޔާއިން ތަކުރާރުކޮށް ހަމަލާތައް މިހާރު އަމާޒުކުރަމުން ދަނީ ހަނގުރާމައިގެ ދުވަސްވަރު ގެދޮރު ގެއްލިފައިވާ މީހުން ބޯހިޔާވަހިކަން ހޯދަމުން އަންނަ ސްކޫލްތަކަށެވެ.
އޮގަސްޓް މަހުގެ 10 ވަނަ ދުވަހު ޣައްޒާ ސިޓީގެ ދަރާޖް ޑިސްޓްރިކްޓްގެ އަލް-ތަބިން ސްކޫލަށް ދިން މިފަދަ ހަމަލާތަކުގެ ތެރެއިން އެންމެ ފަހުގެ ހަމަލާގައި ކުޑަކުދިންނާއި އަންހެނުން ހިމެނޭ ގޮތަށް 100 އެއްހާ މީހުން ވަނީ ޝަހީދުވެފައި އެވެ.
