ދިވެހިރާއްޖޭގެ އެންމެ މަގްބޫލު ޓީވީ ސްޓޭޝަން "ޗެނަލް 13" އަކީ އަބަދުވެސް ސަރުކާރު ޖަވާބުދާރީ ކުރުމަށްޓަކައި ހޭވައްލާ ތައްޔާރުގައި ހުންނަ ޓީވީ ސްޓޭޝަނެއް ކަމާމެދު ދެބަސްވާނީ އަދުގެ ސަރުކާރުގެ ދެތިން ނައިބު ވަޒީރުން ކަން ޔަގީނެވެ.

ޗެނަލް 13 އިން މި ސަރުކާރުގެ ކަންކަމުގެ ވާހަކަތައް ދައްކަންފެށީމައި ގޯސްވީތޯ؟ އެތައް ވައުދުތަކެއްވެފައި، މިއަދު އެ ވައުދުތައް ނުފުއްދާ ވާހަކަ ޝާއިއު ކުރީމާ މި ޗެނަލް 13 ގޯސްވީތޯ؟ ސަރުކާރަށް ސަނާ ނުކިޔާތީ ގޯސްވީތޯ؟

ބައެއް ނައިބު ވަޒީރުންނަކީ ކުރިން ނޫސްވެރިކަމުގެ ދާއިރާގައި އިސްކޮށް އުޅުއްވި ބޭފުޅުންނެވެ. އޭރުގައި ޗެނަލް 13 ވަރެއް ނެތެވެ. ޗެނަލް 13 އިން ގެނެސްދޭ ކޮންޓެންޓް ވެސް ކަމުދެއެވެ. މިއަދު ބަޔަކު މީހުންނަށް ތަނބަކުގައި މަގާމް ދެއްވިމާ މިބުނަނީ ޗެނަލް 13 އިން އެއްވެސް ކޮންޓެންޓެއް ނުގެނެސްދެއެވެ، ގެނެސްދޭނެ ކޮންޓެންޓް ނެތިގެން އެކްސްގައި އުޅޭ "ހަސަން ކުރުސީ" ނަމަކަށް ކިޔާ އެކައުންޓުން ކުރާ ޕޯސްޓްތަކުން ޚަބަރު ހަދަނީކަމަށެވެ. ނައިބު ވަޒީރެވެ. ހަސަން ކުރުސީ ވެސް ހަގީގަތައް އެއްޗެއް ބުނީމާ އެވާހަކަ ދޮގެއް ނުކުރެވޭނެކަން ނޭނގެނީތޯއެވެ.

ޗެނަލް 13 ގޯސްކޮށްގެން މޮޅެތި ޕޯސްޓް ޖަހާއިރު، ހަނދާންކޮށްލަދެންހެއްޔެވެ. ކަމަނާމެން މަގާމުން ސަސްޕެންޑް ކުރުމުން، ކަމަނާމެންގެ ދިފާޢުގައި ތެދުވީ ހަމަ މި ޗެނަލް 13 އެވެ. އަންހެން ނޫސްވެރިން މިތަނުގައި ތިބެގެން އަންހެނުންނަށް އެއްޗެހި ގޮވާކަމަށް ތުހުމަތުކޮށް މޮޅެތި ކޮމެންޓް ކުރާއިރު، ވޭތުވެގެން ދިޔަ ފަސް އަހަރު ކަމަނާމެން އިދިކޮޅުގައި އޮވެގެން އޭރުގައި ވެރިކަން ކުރި އެމްޑީޕީގައި ތިބި އަންހެނުންނަށް ބަސްބުނެ ނޫޅުއްވަންތޯއެވެ.ނޫސްވެރިކަމުގެ ބަދަލުގައި ކަމަނާ ކުރެއްވީ އެކްޓިވިޒަމެވެ.

ކޮންޓެންޓެއް ނުގެނެސްދެޔޭ ބުނިއިރުގައި ޗެނަލް 13 އިން ގެނެސްދޭ ލައިވްތައް ބަލަން ފޭސްބުކްގައި ދެތިން ނައިބު ވަޒީރުން އެބައުޅުއްވައެވެ. ހަމަ އަދިވެސް ތި ބަލަނީ ޗެނަލް 13 އެވެ. ވެރިކަން ގެނެސްދިނުމަށްޓަކައި އެންމެ ބުރަކޮށް މަސައްކަތްކުރި ޓީވީ ސްޓޭޝަނަކީ ޗެނަލް 13 ކަން ހަނދާން ނެތުނީތޯއެވެ.

މަގާމުގައި ހުންނެވި ނަމަވެސް ސޯޝަލް މީޑިޔާ އެކްޓިވިސްޓުން އުޅުއްވާ ޒާތަށް އުޅޭ މަންޒަރު ފެނުމުން ހިނިވެސް އާދެއެވެ. ފާޑުކިޔުމުން އެކަން ބަލައިގަންނާށެވެ. ވޭތުވެގެންދިޔަ ފަސް އަހަރު ސޯޝަލް މީޑިޔާގައި "ފްރީ ޕްރެޒިޑެންޓް ޔާމީން" ޖެހުނެވެ. މިއަދު އެހެން ޖަހަންވެސް ކަމަނާމެން ލަދުގަންނާތީ ދެރަވެއެވެ. މުހިންމުވީ މަގާމާ ފައިސާއެވެ. އެކަން މިއަދު ވަރަށް ވެސް ސާފެވެ.

ވަރަށް ރަނގަޅު ވާހަކައެއް ދަންނަވަންތޯއެވެ، ކަމަނާމެން އަދި ތިހެން އެއްޗެއް ބުންޏަސް މި ޗެނަލް 13 ގެ ޓީމް ތިބޭނީ ސާބިތުކަމާއެކުގައެވެ. ތިބޭފުޅުންނަށް ފާރަވެރިވާނަމެވެ. ވައުދު ނުފުއްދަންޏާ އެވާހަކަވެސް ޝާއިއު ކުރާނަމެވެ.