ސަރުކާރުން އެއްވެސް ހައްދެއްނެތި ޑެޕިޔުޓީ މިނިސްޓަރުން އައްޔަން ކުރައްވަމުން ގެންދަވާކަން ހާމަވެއްޖެއެވެ.

މަތިބަރު ނޫންކަމަށް ދައުވާ ކުރަމުން އަންނަ މި ސަރުކާރުން މިހާތަނަށް ޖުމްލަ 169 ޑެޕިޔުޓީ މިނިސްޓަރުން ވަނީ އައްޔަން ކުރައްވާފައެވެ.

ނިމިދިޔަ ރިޔާސީ އިންތިޚާބުގެ ކެމްޕެއިން ދުވަސް ވަރު ވާހަކަ ދައްކަވަމުން އަދުގެ ރައީސް ޑރ.މުހައްމަދު މުއިއްޒު ވަނީ ކުރީ ސަރުކާރު މަތިބަރުކަމަށް ވިދާޅުވެ ފާޑު އަމާޒުކުރައްވާފައެވެ. އަދި އެ މަނިކުފާނުގެ ވެރިކަމުގައި ސިޔާސީ މަގާމްތަކަށް މީހުން އައްޔަން ކުރައްވާނީ މަދުންކަމަށް ވިދާޅުވެފައެވެ.

ހޯމަ ދުވަހު ފަތުރުވެރިކަމާ ބެހޭ ވުޒާރާއިން ވަނީ އެކްސްގައި ޕޯސްޓެއް ކުރައްވާ އެ ވުޒާރާއަށް އައްޔަން ކުރެވުނު އައު ޑެޕިޔުޓީ މިނިސްޓަރ މީނާސް ޝައުގީ އަށް މަރުޚަބާ ދަންނަވާފައެވެ.

މީނާސް އަކީ 169 ވަނަ ޑެޕިޔުޓީ މިނިސްޓަރެވެ.

މީނާސްގެ އިތުރުން އެމްއެމްޕީއާރްސީގެ މެނޭޖިންގ ޑިރެކްޓާރ ފާތިމަތު ތައުފީގް ގެ ކޮއްކޮ ހިންދު ތައުފީގް ވެސް ވަނީ ޓްރާންސްޕޯޓް އެންޑް އޭވިއޭޝަންގެ ޑެޕިއުޓީ މިނިސްޓަރަކަށް އައްޔަން ކުރައްވާފައެވެ.

169 ޑެޕިޔުޓީ މިނިސްޓަރުން ތިބި ކާން ހާމަކޮށްފައިވަނީ ރައީސް އޮފީހުގެ ވެބްސައިޓްގައެވެ.

ރައީސް އޮފީހުގެ ތަރުޖަމާނުގެ މަގާމަށް އެއްވެސް ފަރާތެއް އައްޔަން ނުކުރައްވާ އަދިވެސް ހަމަ ސަރުކާރުގެ ވުޒާރާތަކަށް ޑެޕިޔުޓީން އައްޔަން ކުރައްވަމުން ގެންދަވާތީ ގިނަ ބައެއްގެ ފާޑުކިޔުން އަންނަނީ ސަރުކާރަށް އަމާޒުކުރަމުންނެވެ.