ރައީސް ޑރ. މުހައްމަދު މުއިއްޒު ވަރަށް އަވަހަށް ސަލާމުގެ ނާށިގަނޑު ހިފައިގެން އިންޑިއާއަށް ރަސްމީ ދަތުރެއް ކުރައްވާނެކަން ސަރުކާރުގެ އިސް ތަރުޖަމާނު ހީނާ ވަލީދު ހާމަކުރައްވައިފި އެވެ.

އެމަނިކުފާނު އިންޑިއާއަށް ވަޑައިގަންނަވާނެ ތާރީހެއް އަދި ނިންމާފައި ނުވެ އެވެ. އަދި, މި ދަތުރުގައި އެމަނިކުފާނާއެކު ވަޑައިގަންނަވާނީ ކޮން ބޭފުޅުންނެއް ކަމެއް މިހާތަނަށް އެނގިފައި ނުވެ އެވެ.

މުއިއްޒު އެންމެ ފަހުން އިންޑިއާއަށް ވަޑައިގަތީ ޖޫން 9ގައެވެ. އެއީ, ނަރެންދުރަ މޯދީ ތިންވަނަ ދައުރަކަށް އިންޑިއާގެ ބޮޑުވަޒީރުކަމުގެ ހުވާ ކުރައްވާ ރަސްމިއްޔާތުގައި ބައިވެރިވެވަޑައިގަތުމަށެވެ.

ދާދިފަހުން އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމާނިއަމް ޖައިޝަންކަރު ވެސް ވަނީ ރާއްޖެއަށް ރަސްމީ ދަތުރެއް ކުރައްވާފަ އެވެ. އެ ދަތުރުގައި ރައީސް މުއިއްޒުއާ ޖައިޝަންކަރު ވަނީ ބައްދަލުކުރައްވާފަ އެވެ.