ތޫފާން ޔާގީއާ ގުޅިގެން މިޔަންމާގައި މަރުވި މީހުންގެ އަދަދު 384 އަށް އަރާފައިވާ ކަމަށާއި 89 މީހަކު ގެއްލިފައިވާ ކަމަށް އެ ގައުމުގެ މީޑިޔާތަކުން ރިޕޯޓްކޮށްފިއެވެ.
ތޫފާން ޔާގީއާ ގުޅިގެން މިޔަންމާގައި މިހާތަނަށް 887،000 މީހުންނަށް އަސަރުކޮށްފައިވާ ކަމަށް އދ އިން ވަނީ ހާމަކޮށްފައެވެ.
މީގެ އިތުރުން، އެންމެ ބޮޑަށް ގެއްލުން ލިބުނު ސަރަހައްދުތައް އަދިވެސް ފެން ބޮޑުވެފައި، ގެދޮރާއި ގޭބިސީގެ މުދަލާއި ފެނުގެ ވަސީލަތްތަކާއި ކަރަންޓުގެ އިންފްރާސްޓްރަކްޗާ އަށް ވަނީ ބޮޑެތި ގެއްލުންތަކެއް ލިބިފައި ކަމަށް އދ.ގެ ހިއުމެނިޓޭރިއަން އެޖެންސީ (އޯސީއެޗްއޭ) އިން ބުނެފައިވެއެވެ.
އަދި މަގުތަކާއި ބްރިޖާއި މުވާސަލާތީ ނެޓްވޯކްތަކާއި ސްކޫލްތަކާއި ޕަބްލިކް ސާވިސް ފެސިލިޓީތަކާއި ދީނީ ތަންތަނާއި ދަނޑުތަކާއި ދަނޑުބިންތަކަށް ބޮޑެތި ގެއްލުންތަކެއް ނުވަތަ މުޅިން ހަލާކުވެފައި ކަމަށްވެސް ބުނެފައިވެއެވެ.
