ޣައްޒާގެ އުތުރުގައި އޮންނަ ޖަބާލިއާގައި ގެދޮރު ގެއްލިފައިވާ ފަލަސްތީނުގެ މީހުންނަށް ހިޔާވަހިކަން ފޯރުކޮށްދެމުން އަންނަ ހަފްސާ އަލް ފަލޫޖާ ސްކޫލަކަށް ނިރުބަވެރި ސަހްޔޫނީންގެ ބޮމުގެ ހަމަލާއެއް އަމާޒުވެއްޖެއެވެ.
މި ހަމަލާގައި މިހާތަނަށް 07 މީހަކު ޝަހީދުވެފައިވާއިރު ގިނަ ބަޔަކު ވަނީ ޒަޚަމްވެފައިކަމަށް ރިޕޯޓްކޮށްފައިވެއެވެ.
ސަހްޔޫނީންގެ ޗެނަލް14 އިން ރިޕޯޓްކޮށްފައިވާގޮތުގައި މި ހަމަލާ ދިން ސްކޫލަކީ އަލް ޤަސަމް ބްރިގޭޑްސްގެ ހަނގުރާމަވެރިން ތިބި ތަނެކެވެ.
ޣައްޒާގެ މީޑިޔާ އޮފީހުން މައުލޫމާތު ހާމަކޮށްފައިވާ ގޮތުގައި ސަހްޔޫނީން މިހާތަނަށް ގެދޮރު ގެއްލިފައިވާ މީހުން ދިރިއުޅެމުންދާ 181 ސެންޓަރަށް ބޮން އަޅާފައިވާ ކަމަށެވެ.
މިދިޔަ އޮކްޓޯބަރު 7 އިން ފެށިގެން އިސްރާއީލްގެ ރައްޔިތުން ފަލަސްތީނުގެ ޣައްޒާގައި ހިންގަމުން ގެންދާ ގަތުލުއާންމުގައި ގާތްގަނޑަކަށް %85 ސްކޫލް އިމާރާތްތަކަށް ވަނީ ގެއްލުން ދީފައެވެ.
