ސަހްޔޫނީން ލުބުނާނަށް ދިން ހަމަލާތަކުގައި ހެނދުނުން ފެށިގެން މިހާތަނަށް 25 މީހުން ޝަހީދުވެފައިވާ ކަމަށް ލުބުނާނުގެ ސިއްހަތާ ބެހޭ ވުޒާރާއިން ވިދާޅުވެއްޖެއެވެ.
ފާއިތުވި ހަފްތާއިން ފެށިގެން ސަހްޔޫނީން އަންނަނީ ލުބްނާނަށް ވަރުގަދަ ހަމަލާތައް އަމާޒުކުރަމުންނެވެ. މި ހަމަލާތަކުގައި މިހާތަނަށް 700 އަށްވުރެ ގިނަ މީހުން ޝަހީދުކޮށްލާފައިވާ ކަމަށް ލުބްނާންގެ ސިއްހީ ވުޒާރާއިން ވަނީ ބުނެފައެވެ.
މީގެ އިތުރުން، ޒަހަމްވެފައިވާ 5،000 އަށް ވުރެ ގިނަ މީހުން ހޮސްޕިޓަލުގައި އެޑްމިޓްކޮށްފައިވާ ކަމަށްވެސް މި ވުޒާރާއިން މައުލޫމާތުދެއެވެ.
ސަހްޔޫނީން އިން ލުބުނާނަށް ވަރުގަދަ ހަމަލާތަކެއް ދޭން ފަށާފައިވަނީ އެ ގައުމުން ފަލަސްތީނުގެ ޣައްޒާއަށް ދެމުން އަންނަ ހަމަލާތަކުގައި ޣައްޒާ ރައްޔިތުންގެ ދިފާއުގައި ލުބުނާނުގެ ހިޒްބުﷲއިން ސަހްޔޫނީންނާއި ދެކޮޅަށް ހަމަލާތަކެއް ދެމުން އަންނާތީއެވެ.
ސަހްޔޫނީނުން ލުބުނާނުން ހަމަލާ ބަދަލުކުރުންތަކެއް ކުރިއަށް ގެންދާއިރު، ލުބުނާނުން ބުނެފައިވަނީ އެގައުމުން އޮތީ ކޮންމެ ފަދަ ހަމަލާއެއް ދީފާނެ ކަމަށް ތައްޔާރަށް ކަމަށެވެ.
