ރާއްޖެއާ ދެކޮޅަށް ހިންގި ބޮއިކޮޓު ހަރަކާތުގައި ބުކިންތަކެއް ކެންސަލްކުރި އިންޑިއާގެ މަޝްހޫރު ޓްރެވަލް އެޖެންސީއެއް ކަމަށްވާ "އީޒް މައި ޓްރިޕް" އިން އަނެއްކާވެސް ރާއްޖެއަށް ބުކިން ހަދަން ހުޅުވާލައިފި އެވެ.

އެ ކުންފުނިން ރާއްޖެއަށް ހަދާފައި ހުރި ހުރިހާ ފްލައިޓު ބުކިންތަކެއް ކެންސަލްކުރީ ޖެނުއަރީ މަހުގެ ފުރަތަމަ ހަފުތާގެ ތެރޭގަ އެވެ. އެ ކުންފުނީގެ ސީއީއޯ ނިޝާންތު ޕިއްޓީ އޭރު އެކްސްގައި ކުރި ޕޯސްޓެއްގައި ބުނީ އެ ފިޔަވަޅަކީ ގައުމީ ރޫހެއްގައި އަޅަން ނިންމި ފިޔަވަޅެއް ކަމަށެވެ.

އަލުން ބުކިންތައް ހުޅުވާލިކަންވެސް އިއުލާނުކުރީ ހަމަ އޭނާއެވެ. އެގޮތުން ހުކުރު ދުވަހުގެ ރޭ އެކްސްގައި ކުރި ޕޯސްޓެއްގައި އޭނާ ބުނީ އަލުން ބުކިންތަކަށް ހުޅުވާލީ ދެ ގައުމުގެ ސަރުކާރުން ކުރި މަސައްކަތްތަކާއެކު ގުޅުން ބަދަހިވަމުންދާތީ ކަމަށެވެ.

އިންޑިޔާއިން ބޮއިކޮޓް ހަރަކާތް ކުރިޔަށް ގެންގޮސްފައި ވަނީ އިންޑިޔާގެ ޕްރައިމް މިނިސްޓަރް މޯދީއަށް ސޯޝަލް މީޑިއާގައި ބޭއަދަބީ ބަހުން ފުރައްސާރަކުރުމުންނެވެ.

އެގޮތުން އެކަންކޮށްފައި ވަނީ ޔޫތު މިނިސްޓްރީގެ ޑެޕިއުޓީ މިނިސްޓަރުންގެ ގޮތުގައި އޭރު ތިބި މަލްޝާ ޝަރީފާއި މަރިޔަމް ޝިއުނާ އަދި މަހުޒޫމް މާޖިދު އެވެ. އެ މައްސަލާގައި މުއްދަތެއް ނެތް ގޮތަށް އެ ތިން ނައިބު ސަސްޕެންޑު ކުރީ މި އަހަރުގެ ޖެނުއަރީ 7 ގަ އެވެ.

އޭގެ ތެރެއިން ޝިއުނާ އަދި މަލްޝާ އެ މަގާމުން އިސްތިއުފާ ދިނީ ސަސްޕެންޝަނުގައި ތިއްބަވައިގެން މުސާރަ ނަންގަވާތާ އަށް މަސްވެފައިވަނިކޮށް ސެޕްޓެމްބަރު 10، ގަ އެވެ. މި މުއްދަތުގައި އެއިން ކޮންމެ މީހަކު މުސާރައިގެ ގޮތުގައި ޖުމްލަ 252،000ރ ވަނީ ނަގާފައެވެ.